Shillong: U Zenith Sangma uwa man u MLA kamjooh uwa yahkhmat ka Congress ha Meghalaya da ong u wa da toh i por ya ki seiñ saiñpyrthai ri-loom kiwa em ha ka sorkar Meghalaya Democratic Allliance (MDA) wa yahkhmat da ka NPP wow pyrkhat bha ki, wei da maham u wa ki paidbah ym maap ki ya ki seiñ ri-loom ha i por wow lai biang ki hadien 5 snem.
Da ong u wa em i klam cha wah cha neiñ wa kani ka sorkar wa yahkhmat da ka NPP toh kawa baam-tooh, tangwa neh ko neidaw i kyrchaan yong ki seiñ ri-loom, wei ki seiñ ri-loom leh ki kyrchaan bait ki ya kani ka sorkar neibhah ki yoh bhah lang ki.
Da ong u wa ki paidbah ka jylla ym maap ki ya kani ka sorkar, wei da toh sakhiat i por wa ki seiñ ri-loom wow pyrkhat noh yow chim ya i rai wa toh.
Ini i ong u Zenith toh hadien wa da pynbaad yei tkoh i krehkaam yong ka sorkar wa da yahkhmat da ka NPP ha ki chnat waphær waphær, wa kynthup ha ka chnat Meghalaya Energy Corporation Limited (MeECL) deiwa pynsah ya ka tulop yong ki wakreh nadooh u Naichiphaw.
Da ong u wa ka Congress ka pynneh bait ko ya i jooh i dawa wow thung ya u Chairman cum Managing Director ha ka chnat MeECL da u sahep u wym duna ya i kyrdan kam u Additional Chief Secretary, u pynman ya ka takit wei wow pynbait noh ya waroh i eh ha katai ka chnat.
Katkam i ong u Zenith, ka Saubhagya Scheme wa ka Deen Dayal Upadhyaya Gram Jyoti Yojna (DDUGJY) da pynkhia chooh chooh ko ya ka MeECL neibhah wym ye u pynkrehkaam wei wa em ka baam-tooh. Nalor ini, ka sorkar da chim ko da ka ram kawa heh wei hawa su ya ka ram, da man ko palat ya i bor næ i iwa ye ka chnat, wei ini i leh daw pynchitom ko ya ka MeECL wei daw pynman yaka sorkar wow ekti noh cha ki Company ki bru samen wow pynlai yaka.
