Ka KSU Laskein Circle haka sngi nyngkong da lai yachem ko wa u Addl. DC ka West Jaiñtia Hills yow ujor pyrchah hajrong i wan tuklar ki pulit ka Assam yow pynsangeh yei chna yaka skur RMSA kawa em ha Psiar.
Haka dorkhat ka seiñ da ong wa ka seiñ ka nood ko wow pyntikna wa ka Psiar toh ka thaw kawa dang haap pura hapoh u pood u ang ka jylla Meghalaya tangwa neidaw wa e laad wei chah jem ki bor pynlai District, kamtæ ka Assam da chlur wei yoh laad ko wow wan tuklar chapoh u pood u ang yong i.
Ka seiñ da ong ko leh wa ka sorkar India lyngba ka Ministry of Human Resource Development, Government of India da sdang ko wow pynkreh yaka skur kawa tip kam ka Rashtriya Madhyamik Shiksha Abhiyan (RMSA) neibynta wow pynbha yaka skur haki kyrdan Secondary haka chnong Psiar, West Jaiñtia Hills, tangwa sñiawsih wow ong wa ha kini ki sngi wa da dep, ki pulit ka Mukoilum Assam da wan ki wow pynsangeh yabor yei kreh ya katai ka skur.
Hajrong i pynsangeh ki pulit Assam yei chna ya katai ka skur, neiliang ka seiñ da kyrpaad joor ko ya ki bor sorkar wow sñiawbha u tuklar hajrong katai ka kaam wut wut khnang wym ktah ya i thmu wow pynkreh ya katai ka skur.
Neiliang u Addl. DC da kular u wow chimkhia ya ini i kaam wei da ong u leh wa daw chong pyrkhat hajrong ini wa kiwi ki khlieh pynlai District.
Ka kyrwoh wa da pynlait da u President ka KSU Laskein Circle u Balawan Suchiang wa u Javeline Shadap Manner, Organising Secy. KSU Laskein Circle.
