U MDC ka Congress na Jowai Central, u Andrew Shullai ynne i step dei mynsien wa sñiawkhia da hiar u cha Mupiah i bynta ka Wah Myntdu ha i thaw wa pynlang (Reservoir) ya ka um ka wow pynpoi ka chnat PHE cha sor Jowai.
U Andrew manda poi ini i thaw da lai sylli u ya ka baan (Dam) kawa kah ya ka um wow pynlang ya ka heiwa da chem wa da piah ko wei ka um da lait ko narood wei ini da pynstang i yei chong ka um ha ini i thaw iwa daw pynthut ya i rukom saam um ha ki bnai wow wan.
Da chem leh wa da chna habra ya kani ka dam heiwa ha ki thaw wa piah da chem wa da em i khyndaw wei da biah khyndaw-bilat won najrong khlem em mooria wa ki naar rod.
Chooh chooh da chem wa neidaw wa da stang ka um da hap khloh ya ki moo wow wailaad ya ka um wow kai ko cha Sumpwell wow taan ya ka cha ka Treatment Plant wa em ha Oorkhla.
Hawa yaklam wa u Andrew da ong u wa hadien wa sñiaw yeini da dap u dei mynsien wa sñiawkhia wow pyrkhat ya i rukom poi um ha Jowai khamtam ha ki bnai wow wan wa khamtam ha i pyrhaw wei ini da pynman i ya oo wow hiar wow pynsakhiat ya ini i man i long ha kani ka thaw.
Da kyntu u ya ki bor sorkar wa toh u pait ya ini wow chna pynmiat not wut wut ya ini wei deiwa paka khnang wow lait u thut i rukom saam um ha Jowai.
U Andrew da ong u leh wa lada ym chna smat yeiwa piah, ki manyung ha Jowai daw chem chitom bha ki neibhah wa duna i poi um, daw pynbor ya ki wow thied um ki iwa man iwa ymye u pdiang.
Heijooh i por da ong u wa lada ya ka Scheme saam um na Mynngot hadooh katni ympu dep tæ kammon u man ka mynried yong i rukom saam um ha Jowai.
