I pyrchang ka sorkar wow yoh ya ki lien suiñ wa wan bait nadooh na Delhi cha Shillong da man ko kawa mankaam heiwa da pyntip wa ha kani ka 21 tarik daw wan hiar ka lieñsuiñ wa nyngkong na Delhi ha Shillong Airport, Umroi.
Kani ka lieñsuiñ toh ka wow mih na Delhi heipor 10 waje i step wei daw poi ko ha Umroi heipor 1:10 i sngi.
Ka jooh biang ka lieñsuiñ daw mih ko na Shillong cha Delhi heipor 1:50 ka jooh ka sngi wei daw poi ko ha Delhi heipor 5 waje i janmiet.
Da ini da yooluti ka sorkar wow pynboon yei wan kiwa uiñke suwari kiwa da pdiang nadooh ka 21 tarik uni u bnai deiwa wan sak cha Shillong khlem hap wow hiar de ha Guwahati.
Ki lieñsuiñ toh kiwa pynlai daka FlyBig kawa dang sdang thymme kawa da yoh bor leh wow hær cha Mizoram, Tripura, Arunachal Pradesh, Assam wa ha Kolkata.
Ka FlyBig toh kawa da jop yaka Tender wa khut daka Meghalaya Transport Corporation hawa sdang uni u snem wei daw sdang deiwa hær arsien chi tayaw deiwa pynemkaam yaki lieñsuiñ Bombardier Q400 Aircraft katkam ka soskular wei daw pynku yei boon i lai luti ki lieñsuiñ na Shillong ha ki bnai wow wan.
Kam wow pynkynmoo wa ha u Naiynñiaw u 2019 da sdang yei hær ki lieñsuiñ na Kolkata cha Shillong.
