Shillong: U Chairman ka Meghalaya State Planning Board uwa man leh kam u MLA/MDC ka Nongkrem Constituency, u Lambor Malngiang ynne ka sngi da wai u ya ka Community Hall ka Laitkor Dorbar Pyllun ha Laitkor, Shillong.
Ya ini i kaam da sdang nadooh u snem 2016 iwa sdang da u H.S. Shylla, u montri sorkar warim kamjooh u CEM warim ka Khasi Hills Autonomous District Council (KHADC), heipor wa man u kam u MDC ka Nongkrem Constituency. Ya ini i kreh da sdang da ka KHADC da ka poisa T. 15,00,000 hapoh ka Special Assistance Scheme 2015-2016. Neidaw wa kani ka kaam neh ko khlem pyndep, neiliang u Lambor Malngiang da pynyoh poisa u T. 10,00,000 naka Under Excluded Areas 2018-2019 Scheme.
Hawa e yei klam, u Lambor Malngiang da pynsñiaw u yei kmen wa da dep wow pynchna ya kani ka Community Hall wei da pyntip u wa da pynlait poisa sa T. 45 lak yow pynheh chooh ya kani ka Community Hall kawa daw kynthup yaka Counselling Center deilang wa ki thaw booh dukan kawa daw yarap pynmih poisa yaka Dorbar Chnong kawa daw pynemkaam yow pynku yaka thaaiñ. Da pyntip u leh wa da em boon ki Scheme kam i chna skur, i pynpoi um, i booh Streetlight wa kiwi kiwi neibynta i bha i miat ki khynroo wa ki kynthai ka chnong ka thaw.
Kiwi de kiwa klam toh u P.T. Passah, BDO, Mylliem C&RD Block, ka Sweet C. Syiemiong, ka khon u (L) H.S. Shylla, u Paiem Ainam Manik Syiem, Acting Syiem ka Hima Mylliem wa u Leonard Arun Mawri, Chairman ka Laitkor Dorbar Pyllun.
Ha kani ka sngi da emlang leh u Rangbah Chnong, Secretary Chnong, Rangbah Dong, Seng Samla Shnong, Seng Kynthei ka Laitkor Pyllun wa kiwa mihkhmat naka Laitkor Sports Club.
