U Union Minister ka Road Transport & Highways u Nitin Gadkari da pyntip u ynnin ka sngi wa deiwa pynemkaam daka GPS (Global Positioning System) yow kheiñ dan yaki kari wa lai luti, ka India daw lait ko nei emkaam wow booh ya ki Toll Plaza ha ki ar snem. Da ong u leh wa ini daw yarap ko yaka sorkar wow yoh hadooh T 1.34 Trillion ha ki 5 snem.
Ka sorkar da dep ko wow pynbait noh ya kani ka kheiñ dan deiwa pynemkaam da ki GPS iwa daw pyndooh yei hap sangeh ki kari. Da pyntip u leh wa yaka poisa daw ah bait naki Account iwa chong katkam i lai luti ki kari.
“Deiwa yarap ka sorkar ka Russia da pdiang i ya kani ka GPS System wei ha ki 2 snem wow wan daw pynemkaam da i stat GPS,” da ong u Gadkari haka yalang Assocham Foundation Week.
Da ong u wa katni waroh ki kari kamai toh kiwa em yaka ‘Vehicle Tracking System’ wei ka sorkar daw pyndait ko ya ki GPS ha ki kari warim.
I yoh dan na ki Toll Plaza ye ko wow poi hadooh T. 34,000 klur hadooh u Wisu (March) 2021 wei deiwa pynemkaam da ka GPS yow chim yaka bai Toll, ka poisa kawa ye u yoh ha ki 5 snem u man ko T. 1.34 Trillion da ong u.
Da ong u leh wa deiwa pynemkaam daka stat GPS ym wiar de ka poisa wei daw man ko leh iwa khooid.
Katni ka sorkar da pynemkaam ko da ki RFID (Radio Frequency Identification) Tags kiwa tip kam ka FASTag kiwa da yoh ka sorkar 3 bhah naka 4 bhah ka dan na u FASTag hadooh u Khonchonglad (Nov).
Kam wow pynkynmoo wa ya FASTag da sdang wow pynkrehkaam nadooh u Kmaichonglad (Dec) 2019 ha waroh ki Toll Plaza ka NHAI.
