U Chairman ka CoMSO, u Robertjune Kharjahrin da ong u wa hei yong sakhiat, ynne ka sngi da thoh wow kmen wow sñiawbha neibhah wa ynnin u snem waroh 60 ngut ki MLA da mynjur ki ya ka rai (Resolution) dawa ILP, tangwa ya ini i rai da kset hi-eh ha ka synduk nar ka Home Ministry ha Delhi. Da ong u wa hadooh katni ym em da burom ya i kwah ki paidbah ka jylla deiwa kheiñke ya i dawa.
Da thær u ya ka Congress ha Meghalaya wym tuklar næ ujor pyrchah ko ya i wan wow pyrchah ILP ha Meghalaya, hanla ka Congress ha kani ka jylla da kyrchaan ko ya i dawa ILP ha kani ka jylla. Da ong wa i leh yong u MLA ka Assam da pynyoo ko wa kheiñpoh u ya ka yung dorbar ha kani ka jylla, wei neiliang ka CoMSO da dawa ko na ka Congress ha kani ka jylla wow phah pyndam chi syndon ya ka chithi u MLA ka Assam wow pyrchah ya ka ILP.
U Robertjune da maham u wa ym toh wow tuklar ya ki kaam ka jylla, wei da dawa leh wow pynchitom syndon da ka Meghalaya Legislative Assembly neibhah wym burom ya ka yung dorbar chna aiñ, wei lada ym ye toh wow pyndam syndon ya katai ka aiñ. Ha kani ka yalang, u Chairman ka CoMSO da pakhet syndon u ya i dur yong u MLA ka Congress na Assam kam ka dak wow pyndooh burom yei muchlia yong oo.
Ha i jooh i por u Kharjahrin da kitbok u ya u Montri Rangbah wow khlan noh u na u khñiang COVID-19 yow lai cha Delhi yow pynyoh syndon ya ka ILP ha ka jylla.
