Shillong: U Montri sorkar wa pait yaka Rep ka Riang u Banteidor Lyngdoh ynne ka sngi da wai u yaka Veterinary Dispensary ha chnong Thangsning, East Khasi Hills hei emlang u Montri ka C&RD, u Hamletson Dohling wa ki sahep ka chnat Animal Husbandry & Veterinary.
Ya kani ka Dispensary da pynku kyrdan naka Veterinary Aid Centre wei da chna hapoh ka RIDF-XXIV hei dor T. 1,45,78,000.
Hawa e yei klam u Lyngdoh da ong u wa kani ka Dispensary daw pait ko yei chait i khiah ki mrad wa psan ha kani ka thaaiñ. Neidaw wa kiwa boon ki bru ha Thangsning toh kiwa ri mrad khamtam ki sniang kamtæ da emkaam ya i thaw wow pait yei chait i khiah ki mrad, da ong u. Da yooluti u leh wa ki paidbah ka thaaiñ wa ki chnong wa em chajan daw yoh myntoi bha ki na kani ka Dispensary deiwa kyntu leh ya ki paidbah wow ya krehlang waka sorkar yow pynman yei thmu ka sorkar iwa jop.
Neiliang u Dohling hawa e yei klam da ong u wa i roi i paar u wan i du hadien wa ki paidbah yatylli ki wow krehlang waka sorkar. Da khana u leh wa ka sorkar da dep ko wow wanrah ya kiwa boon ki kaam ri mrad (Livestock Mission) kiwa da booh thong wow pynku yei yoh i kot ki warep kamjooh wow pynmih khih mih khan. Heijooh i por da khut u ya ki paidbah wow chim ki yei ri mrad deiwa rap heh yow ye u pyndap leh yeiwa emkaam ka jylla.
Kiwi de kiwa klam toh u Director AH & Vety., Joint Director (Adm) AH & Vety. wa u Sordar ka Thangsning.
