Shillong: Kam chibynta wow yada naka khlam COVID-19 hapoh ka jylla, kamjooh hapoh ka District, yow ye leh wow pyndooh ya kani ka khlam. Ka District Magistrate, East Khasi Hills District da pynmih hukum ko ynne ka 19 tarik u Kmaichonglad (Dec), 2020 hapoh Section 144 CrPC deilang waka Regulation 3 ka Meghalaya Epidemic Diseases, COVID-19 Regulations, 2020 yow pynkrehkaam biang yaka Night Curfew ha East Khasi Hills District nadooh ka 21 tarik uni u Kmaichonglad, 2020 hadooh ka 1 tarik u Duiatra (Jan), 2020 neibynta i por 11:00 PM hadooh 5:00 AM man-ka-sngi.
Tangwa kani ka Night Curfew daw pyndam neibynta i miet ka 24, 25 wa 31 tarik uni u bnai neibynta ka lehkmen Christmas wa snem thymme hapoh ka District.
Ka District Magistrate da pyntip ko wa kani ka hukum ym krehkaam ko yaki pulit, ki chipai, ki Civil Dfence & Home Guards Volunteers, ki wakreh hei chait i khiah kiwa leh yei kaam wa yatoh wa u COVID-19, ki Wholesale wa Retail Pharmacy, Fire & Emergency Service, MeECL, NEEPCO wa Power Grid, ki kari FCI, ki wakreh sorkar kiwa leh yei kaam yong ki wa ki wakreh ki Corona Care Centre, Information & Public Relations Department, ka National Highway & Infrastructure Development Corporation Ltd (NHIDCL), Shillong Municipal Board waka Telecom Service.
Kini waroh hap ki wow bood thij yaki kyndon sorkar kam yaka Social Distancing, i pynduna yaki bru wakreh yong ki wa kiwi de ki kyndon wa da pynmih daka Health and Family Welfare Department, khlem pep.
Chah hi yei lai i wan ki kari wa kit yaki mar wa emkaam, kiwa kit chipai, ki tiar sumaar sukher, ki thaw chna kari leh toh kiwa lait na kani ka hukum. Kiwa yah kari wa kiwa yarap yaki hap ki wow leh yaka Medical Screening katkam ki kyndon.
Yaki Curfew Pass ye wow yoh lyngba ka Online Application ha www.eastkhasihills.gov.in.
