Jowai: Ki paidbah ka Dong Khliehrymphum, Ladthadlaboh (wa em chadien Polytechnic) wa kynthup ya ki khynroo khyllood da mih paidbah ki wow chna ya u sarok uwa khlaad na Kiang Nangbah-Dulong Road chapoh kani ka Dong.
Da chna ya i bynta wow psiah chapoh kani ka Dong neidaw i man i long yong oo da sih bha i heiwa ha ini i chna da pynemkaam da i khyndaw-bilat, chyiap wa u moooria wei ya i lut waroh toh da e sñiawbha da ki khon ka Dong.
U waheh ka Dong, u Stranger Lamare uwa da yahkhmat ya ini i kreh da ekhublei u ya waroh ki dkhot ka Dong kiwa da e yarap wei kiwa da mih paidbah hadooh wow chna ya i bynta uni u sarok.
Ka dong Khliehrymphum toh ka Dong kawa dang haap hapoh i pait i yoo ka Dorbar Chnong Ladthadlaboh wei katni da sdang boon ki yung hapoh kani ka Dong tangwa u sarok uwa jrong kamwa 3 km tam toh uwa da sih ware khamtam heipor ly’ur wa em u slap.
Neiliang u Stranger da pyntip u wa neiliang ka Dong da e dorkhat ko cha u MLA wow kyrpaad wow e yarap na ki Scheme sorkar wow chna ya u sarok wei da kyrmen skem ki leh wa u MLA daw chimkhia u yeini katkam i angnood ki khon ka Dong.
