Ha kini ki sngi da mih i sahkut kari ha tymbud u sarokbah NH-6 ha East Jaiñtia Hills neidaw wa khang ya ki truck wa kit palat pood wow lai ki, ynne ka sngi kiwa kitkaam ka Meghalaya Truckers Union (MTU) hapoh i yahkhmat u President yong ka u Monte Ranglong wa u General Secretary yong ka u W. Sohtun da lai sakhi ki yeini i rukom khang ya ki truck wei wow yaklam leh wa kiwa yah truck.
Ha ini i yachem neiliang kiwa yah truck kamjooh kiwa yarap (Handyman) da pynsñiaw ki yei mynsien wa sñiawsih wa i mynsien wa chrai neibhah da neh ki chithaw don aw jan kattu la 3-4 sngi heiwa da chem chitom ki nadooh ki thaw baam hadooh ki thaw lai paikhana wei khamtam i lut i sep yong ki.
Hadien ini neiliang kiwa yahkhmat ka MTU da lai yachem ko wa u DC ka East Jaiñtia Hills, u E. Kharmalki wow yaklam hajrong ini i eh i khoo wa mih neini i khang truck.
Manda kut ka yalang neiliang u Ranglong da pyntip u wa neiliang u DC ka District da kular u wow chah noh wow lai ki truck kiwa lai Local namo kiwa lai cha Shillong, Jowai, Nongstoin wa kiwi ki thaw kiwa ym emkaam wow lai lyngba ka Yingkieñ Damsite wa ka Yingkieñ Dwar Ksuid.
Chooh chooh da kyntu u leh ya ka sorkar wow chah noh u lai ki truck kiwa thmu wow lai cha Nongpoh wa Guwahati neibhah wa da sahkut ki da boon sngi kattu.
Neiliang won u Sohtun da ong u wa ka truck 12 chaka du ka khia ko 15 ton wei ka sorkar u chah ko du 5 ton (iwa mut wa chah ka sorkar ya ki kari hapoh 20 ton) man i iwa doohnong ya ki.
Da kyntu u leh ya ka sorkar wow chah u kit 30 ton (15 ton i mar) khnang wa ki leh ym chah ktah ware ki.
Heiyatoh wa ki truck 6 chaka da ong u wa lada kit ki katwa kit ki mar ymye ki u palat yei khia iwa 30 ton (ka kari wa i mar) wei da chah ya ki wow lai bait ki lait noh manda poi ki ha Lad Smit chwa wow psiah cha Shillong ye ki wow ksoh ya ki chipor.
Da kyntu u leh ya ki bor District ka West Jaiñtia Hills wa ka East Khasi Hills wow chah u lai kini ki truck.
