Ka seiñ Jaiñtia Youth Federation-CB da kani ka wyrta chim ko ya kani ka kabu wow e khublei Christmas kyrpang ya waroh ha u ni u snem 2020 kamjooh leh u snem thymme wasuk wa kmen.
Ka seiñ da ong ko wa uni u snem sakhiat man uwa dap dei eh wei tynjooh ha waroh ki liang nei wan syndet ka khlam COVID-19 uwa da pynklumar ya waroh liangwanang.
“Uni u khiang ktah u ya ki bru, nadooh i khih i kreh, i lai i wan, i kjut i chitom, i khawai dawai kamtæ ter ter, yoo lakam wym yoodur de haap slap heipor wa emkaam. Tangwa heipor wa kam ini u Blai wa dap dei maya wei yoo wyrai ya ki bru, pynkynmoo u wa lyngba ka Christmas da phah u yow khon yong oo, u Jisu Khrist, wow wan cha pyrthai wow e i kyrmen yow bru. I emkaam u kynmoo i wa waroh iwa jia toh dei tip u Blai. Kamtæ ka seiñ kyntu ko ya waroh wow man i ki bru wa em i kyrmen ya iwa bha neini chakhmat neibhah u Blai da u khon yong oo daw kit u yei eh i khia yong i yong phi waroh,” da ong ka seiñ.
Ka seiñ da ekhublei snem thymme ko leh ya waroh wei ngait skem ko wa u snem wow wan daw wanrah u yei bha i miat liang wanang.
