Da u- Soolangki D. Laloo
U Kiang Nangbah da ka ñia wa ka yurim yong i hok yieñ yalehpyrchah u ya ki bru ka sorkar pharæng kiwa wan cha kini ki loom yong i da ka luti i lehbor wow pyndooh yei hok ki tre ri tre muluk kamjooh yei man kyrpang ka jaitbru. Kam u bru wa em i kitkhlieh ya ka ri wa ka jaitbru, ym kwah u wa ki khmat yong oo u yoo ki yei chah lehbeiñ næ ki chkoor yong oo u sñiaw ki yei ood ki khon ka ri miet wa sngi neidaw i leh embor ki chipai ka sorkar pharæng. Kamtæ khlem tieñ, khlem kheiñ yei rynyieñ wa kordor yieñ dap chynrang u wow yaleh pyrchah ya ki bor ka sorkar pharæng du da ka wait ka stieh, u soom, khnam wa ryntieh chirrup i ksoohktilang ki khon ka Ri 12-Dolloi kat hadooh wow poi u pood ya oo wow pynchah dow rdang ha’u tylle pasi ka sorkar pharæng kawa man ha ka 30, Kmaichonglad 1862.
Ki kyntien kiwa u Kiang klam u hakhmat u paaid waboon walang chwa wow pasi ya oo, kiwa ong u kamni næ, “Lada kyruiñ i khmat oo cha mihsngi, hapoh 100 snem daw yoh laitlooid ka ri. Lada kyruiñ i khmat wan oo cha sepsngi, yanom hei broo u im ka ri”. Ki kyntien Blai u Kiang man sakhiat ki ka sakhi hakhmat ka pyrthai heiwa du hapoh 100 snem kut i synchaar embor ka sorkar pharæng yoh ka ri India yei laitlooid ha u snem 1947. To tip khon ka Ri! Ka Thma U Kiang Nangbah ym mut kut ko du ha ki syrdooh u tylle pasi, ka thma u Kiang pteiñ ko chadooh cha Dwar u Blai, heiwa kam u Sangia yieñ u wow yasait yatah hakhmat u Trekirot neibynta wow lait ka ri wa ka jaitbru nei broo.
U Kiang Nangbah kam u khon dap chynrang ka Ñia Rimai Nangbah, da pynyoo sakhiat u yei man chlur wa Hok i yong oo. Kam uwa yahkhmat wa sakhiat yong ki khon ka Ri 12 Dolloi hakhmat ka Dorbar wa man ha madan Madiah Kmaiblai yieñ u nakhap u waboon walang wow paan ka sakhi Blai dei wa ngam ha thwai Syntu Ksiar wei wow rah ya u dieñ wa em le chnat wa ki sla wa yirngam wa kdaw wa pynyoo ka dak ka sakhi yeihun, i emlang ki Blai ki syiem hei wow chimkti u kam u yahkhmat ki khon ka ri 12 Dolloi. Kam u khon ka chnong Jwai wa em sakhiat i kitkhlieh ya ka ri wa ka jaitbru ym hun ki khmat u wow yoo wa ki mynder ri u man ki kiwa synchaar katwa ki tre ri tre muluk u im ki hapyrdi i tynjooh wa ki umkhmat wakai wajoo. Kam u bru wa maya ya ka niam, ka rukom, dustur, riti ym kwah u wa kini kiyi kiyi ki rukom man kyrpang ka jaitbru u dooh u dam ki. Kamtae kini kiyi kiyi pyndukha ki yei man i sñiaw yongm oo wow yaleh pyrchah hadooh wakut.
Related posts
To, khon ka ri kam ki pateiñ kani ka juk wan, yi em i wow ong wei iyi watoh u leh i neibynta i burom wei naam u Kiang Nangbah? Yi em i wow ong næ kylli chaphang ka ri 30 Syiem-12 Dolloi ha kini ki sngi ki por wei iyi u leh i neibynta ka ri wa ka jaitbru kawa dap sadu i tynjooh kat cha wa pait wa kyruin? Yi em i wow ong næ kylli ya ki yahkhmat næ kiwa mihkhmat kani ka pateiñ wei iyi da leh ki neibynta wow yada yei hok wei man kyrpang ka ri wa ka jaitbru wa khian paaid ka yong i? Toh sakhiat mo, wa bood nongmuna ki ya ka luti wa miat wa bha u Kiang Nangbah?
KIANG NANGBAH KHLAWAIT KA RI
Kiang Nangbah, dap chynrang ka Ri
Khlawait wa khroo man mi!
Napyrdi u paaid, waboon waroh
U Blai ya me dajied dathoh.
Me sakhiat u tæ u Khad-ar bor
Wym em i thok, wym em i chukor.
Chisur Chidur hei hok wa ka yurim wa skem yieñ mi
Wow yaleh pyrchah ya ki mynder sepsngi
Mynsien maya Ri pynyoo mi ki
Hadooh wakut ha’u tylle pasi.
Khroo yutang sakhiat man mi
Neibynta ka jaitbru, ka Ri
Nongialam, Nongialeh kam me!
Cheiwon u chem wan de.
U bru wa em ka nia ka yurim
Ya ka Ri wa ka jaitbru u pynim.
Kyntien wahok kiwa khlai mi
Kyntien yong me man ka sakhi.
Ha khmat u bru na dwar u Blai
Yei suk wanrah mi cha pyrthai.
Aa! woh Kiang han em mi cha Sangia
Ya ka Ri wa maya yong me to ksan ñia.
To e i sneiñ, pynyoo cha wa thiah wa chong
Yoh ki khon ka Ri u tip u kune, u syndong.
To psiah hei mynsien wei sñiaw ki khon ka ri
Ha ki nongialam ka juk katni.
To yah, to chdooh lang ya ki
Ha ka luti i hok wa chisur donhi.
Khon ka Ri! ka juk katni
Khutlang oo waroh ya phi.
To ya bood nongmuna wabha
Kam u Kiang wa maya yong phi yong nga.
Mynsien atnood, bichni
To beh chajngai nanga, naphi,
Ya sñiaw chi-payu, yaman iwi
Yow im ka jaitbru yow im ka Ri.
