Neiliang ka Dorbar Chnong Cham Cham da ong katkam wada chah ka sorkar wow wai noh ya ki thaw uiñke suwari, kamtæ da pyntip ko cha phi ki paidbah waroh hapoh ka Ri-loom Khasi Jaiñtia wa hawa yatoh wa kini ki por lehkmen sñiawbha snem thymme wei e khublei snem warim, ka Dorbar Chnong Cham Cham pdiang sñiawbha ko yei wan uiñke suwari phi cha ki thaw laike paitke kiwa ka em ha kani ka chnong kiwa tip kam ka Sahksaw Fish Sanctuary, Skha Thwai Marang Beach wa ka kchaaid Rynji.
Ini kynthup ya kiwa wan baamdoh kiwa wanke kiwa hap wow bood ya ki kyndon ki aiñ sorkar yow yada nei poor u khñiang COVID-19.
Kamtæ da kyrpad ya phi wym hoi u pynjakhlia phi ya ki thaw wada dep phi u pynemkaam deiwa sñiawbha phi u yakrehlang chirup wa ki aiñ ka Dorbar Chnong.
Da kyntu ya phi wym toh u pynmih ya iwon iwon i kulmar hawa wan phi cha kani ka thaw wei wow pynthut phi ya kiwi tawan, heijooh i por kamwa pynkynmoo ya phi ki lok ki jor i por wai toh nadooh 8 waje step hadooh 8 waje i miet.
Kamtæ da booh leh ya i kyrpaad ya phi ki lok ki jor wow man phi kiwa krehlang chirup wa ka Dorbar Chnong Cham Cham deiwa bood ryntih ya ki kyndon ki aiñ ka Dorbar Chnong.
Neiliang ka Dorbar Chnong Cham Cham da chim ko leh ya kani ka laad wow e khublei snem thymme wa suk wa kmen ya phi waroh yow yoh phi da i chait i tram i maya wa i suk i saaiñ.
Ka Wyrta na u Waheh Chnong ka Cham Cham.
