Ynne ka 2 tarik, ka Rama Krishna Mission, Sohra Ashram da wan ko wow e yarap da ki sula, ki that cha ki 210 ngut ki tre chnong kiwa dooh wa sah ha ka chnong Kyndongtuber, West Jaiñtia Hills District.
Yeini i e yarap da yahkhmat da u Wabu Manbha Lyngdoh, Lecturer hei emlang u Maharaj wa ki wakreh yong ka Rama Krishna Mission, Sohra Ashram.
Neiliang u Waheh Chnong ka Kyndongtuber hawa e yei klam chwa wow saam ya kini ki sula ki that, da pdiang sñiawbha u ya ki wakreh yong kani ka Ashram wei da pynsñiaw u leh yei sñiawngooh wa khroo ya u Secretary Maharaj, ya u Wabu Manbha Lyngdoh wa kiwi kiwi ki wakreh yong kani ka Ashram neibhah ini toh i sien wa ar wa da wan ki wow yarap yaki wa dooh wa sah ha kani ka chnong.
Da pynkynmoo u leh wa kani ka jooh ka Mission da dep wan saam khoo sam baam ki heipor wa em ka Lockdown nachwa wei heini won da wan biang ki wow e yarap da ki sula ki that. Da e u leh yei kyrkhu kyrdoh ya kani ka Ashram wa ya u Secretary Maharaj wow lai ki chaphrang wow chakri yaka imlang sahlang kamjooh leh wow yoh ki yei chait i tram.
Neiliang ka Ashram, da yoh yei klam wa tbian na u Wabu Manbha Lyngdoh uwa man leh u Lecturer ka skur Rama Krishna Mission Sohra wa u Central Executive Member yong ka Mission. Da pynsñiaw u yei kmen wa da yoh ki ya kani ka laad wow wan e yarap yaki paidbah wa dooh wa duk. Da pynsñiaw u leh wa ka thong yong ki toh u chakri ya ki paidbah khamtam kiwa emkaam yei yarap wa mut leh kamwa chakri yow Blai. Da pynsñiaw u leh wa ya ini i kaam yarap da kyrchaan da ka ITC cha ka RKM Sohra Ashram.
Da sdang wow saam ya i e yarap heipor 12 waje i pyrdi sngi deiwa yarap lang leh da ki wakreh ka Ashram, Secretary Chnong, Secretary VEC, ki Waheh Dong wa kiwi kiwi ki Volunteer.
Kani toh ka wyrta wa da phah du Waheh Chnong ka Kyndongtuber u S.E. Siangshai.
