Kamwa 1.5 lak ngut ki wakreh ha ki kaam sumaar sukhær ha Assam wa kynthup ya ki ASHA wa Anganwadi daw man ki kiwa nyngkong dooh wow yoh ya i dawai (Vaccine) wow yada na u khñiang COVID-19, pyntip ki sahep ka kaam i chait i khiah hapoh ka jylla.
Kini kiwa yaleh kiwa toor hakhmat dooh wow yaleh pyrchah yaka khlam toh kiwa da dep thap pyrtuid hapoh ka Co-WIN App.
Kam wow pynkynmoo wa i pyndur namo ka Dry Run wow e dawai Vaccine da leh nyngkong chwa ha Assam chwa wow kut u snem wei neiliang ka sorkar India leh da mynjur ko ya ar jait ki dawai wow pynemkaam noh ha India kiwa chna daka Oxford-AstraZeneca iwa tip kam i Covishield wa i yong ka Bharat Biotech iwa tip kam i Covaxin, neiliang u Montri ka chnat i chait i khiah u Himanta Biswa Sarma da pyntip u wa hadien ki wakreh ha ki kaam sumaar sukhær daw pynbood yei e ya ini i dawai sa ya ki pulit wa kiwa sikai wei hadien ini daw e sa cha kitu kiwa em chwa ki chitom.
Kam wow pynynkynmoo wa ha Meghalaya da dep rai ka sorkar wow e chwa ya ini i dawai cha ki wakreh ha ki kaam sumaar sukhær kiwa 25,000 ngut wa kynthup ki wakreh sorkar wa ki yong ki wakreh ha ki thaw sumaar ki bru samen.
