Ka chnong Pamrakmai, East Jaiñtia Hills da pynsñiaw ko yei sñiawngooh wa khroo ya ka Rama Krishna Mission, Sohra Ashram wa da wan e yarap ko da ki that ya ki kamwa 249 tylli ki manyung wa emkaam yarap hapoh ka chnong ha ka 2 tarik uni u bnai.
Ya ini i wan eyarap da yahkhmat da u Manbha Lyngdoh ryngkat u Maharaj wa kiwi kiwi.
Neiliang u Acting Waheh Chnong ka Pamrakmai, u K. Rymbai da pynlai u ya ka yalang wa tbian ha kani ka sngi wei da yoh i klam na u LM Shylla uwa man leh u Chairman ka chnong wa u Abraham Shylla uwa man u Executive Member ka chnong heiwa da pynsñiaw ki yei sñiawngooh yei leh ka Mission heiwa kani man ko ka sien wa ar wa da wan e yarap ko hapoh ka chnong.
U LM Shylla da pynkynmoo u wa heipor wa em ka Lockdown, ka Mission da wan e yarap ko da ki mar baam cha ki khon ka chnong heiwa da yoh yarap ki kattu katni donhi ki manyung.
Ha kani ka kynti, neiliang ka chnong da kitbok kitrwiang ko wa u Blai u kyrkhu kyrdoh u ya kani ka Mission wa ya u Maharaj kamjooh leh ya u Manbha Lyngdoh wow pteiñ ki hei chakri yong ki ya ki paidbah.
Neiliang ka Mission da yoh i klam wa tbian na u Manbha Lyngdoh, heiwa da pynsñiaw u yei mynsien wa kmen wow yoh kam kani ka laad wow wan e yarap wa kyrpang ya ki manyung ka chnong heiwa da pynsñiaw u leh yei thmu yong ki toh wow chakri ya ki para bru heiwa i leh ya ki kaam wa bha toh i chakri ya u Blai wei da ong u wa ini i wan e yarap toh deiwa kyrchaan (Sponsor) ka ITC lyngba ka RKM Sohra Ashram.
Kani toh katkam ka wyrta na u K. Rymbai uwa man u Acting Waheh Chnong ka Pamrakmai.
