Neiliang uwa chong chnong ka chnong Shymplong, EJH u Dabiang Syih da pyntip wa hadooh ynnin ka 6 tarik ki dakha haka wah Lukha dang pteiñ hi ki wow yap iwa da sdang nadooh ka 3 tarik uni u snem thymme.
Ini toh hadien wa dap 1 bnai nadooh wa da kylla rong biang ka wah Lukha iwa da jia awjan man-ka-snem nadooh u 2007.
Neiliang yong u Syih da suba u wa ini da jia hi toh wa da wan i bih na ki karkhana pynmih khyndaw-bilat kiwa em cha jan iwa ye u man hei dur ki jakhlia kam na ki dawai (Chemical), u mooyong wa da pynemkaam da ki karkhana, tangwa sñiawsih u wa ka District Council kawa mantre ya kani ka wah ym em leh ko iyi iyi leh kamjooh ka sorkar jylla leh da iehbieñ ko ya kani ka wah wa ya kiwa chong chnong kiwa jooh dih, sait that wa ki bru kiwa em hadooh 80% kiwa im kamai ja-kpoh na kani ka wah kiwa da kthang neidaw wa man ko i dooh wa khroo ya ki.
Da pynrem joor u leh ya ka 6 Shnong Association kiwa kam ya idæ kam kiwa yada ya ka wah Lukha, tangwa hawa pait katni yoo la kamwa chet kylla ya u paidbah yong ka 6 Shnong, wei sñiawdiaw u wa ym em leh ki iyi iyi leh yeiwa yap ki dakha ha u snem 2020.
U Syih da ong u leh wa kamwa man kattæ naka 100% kamwa 80% ki dakha da yap ki katni, heiwa lada lai dei miet cha kani ka thaw wa em ka wah Lukha, da yoo leh ya ki bru ki spah ngut kiwa wan na ki chnong waphær waphær kam na Sonapyrdi, Shymplong, Kuliang, Borsara, Sakhri, Lum Tongseng wa na kiwi ki chong wa marjan, kamtæ da kylli u wa kiyi wow kitkhlieh ya kini ki bru lada na ini i baam yong ki ya kini ki dakha ktah ko yei chait i khiah yong ki, ka sorkar næ kitu wa e bih ya kani ka wah?
