Ka Hill State People’s Democratic Party (HSPDP) da pynsñiaw ko wa dang yieñ skem ko wow dawa ya ka jylla (Khasi-Jaiñtia State) lyngba ka Article 371, wei neiliang ka Party ka em ko yei thmu wow yaklam sñiawthooh wa ki kynhun wow yakhun yow yoh ya ka Garoland kamwa da yaklam nachwa wa ka Garo National Council (GNC).
U KP Pangniang uwa man u President ka HSPDP, da ong u wa man iwa emkaam wa ka jaitbru (Khasi-Pnar) u em ko i yong ka hi i tipmit wa i pyrtuid hawa lai cha baar na ka jylla.
Da ong u kamwa man kattæ, ki Khasi-Jaiñtia ki em ki ka yong ki hi ka tynre hawa ya nujor wa ki Garo nadooh ka rukom im wa i tipmit, deiwa ong chooh chooh wa lada yoh ka yong i hi ka jylla daw em chiboon ki yoh nong ya ka jaitbru nadooh i tipmit ya ka ktien ka thylliej, wei khamtam ha ka bhah kaam bhah jaam kawa katni lai ko mar 40%, tangwa lada yoh ya ka jylla yong i hi, ka Reservation Policy leh daw wiar noh ko.
