U Chairman ka Confederation of Meghalaya Social Organisation (CoMSO), u Robertjune Kharjahrin da ong u wa ka sorkar jylla toh u pynmih paidbah ko ya ka bui (Report) wa da phah da ka Sub Committee cha ka High Level Committee (HLC) heiyatoh wa i kyrriah ya ki bru na Them Metor, neibhah ym tip iyi iwa da tyrwa ha kani ka bui.
Da ong u wa ka CoMSO daw booddien ko yeini deiwa yachem wa ki dkhot ka HLC wa kynthup nadooh u Chairman wa kiwi kiwa embynta ha ini i kaam wa yatoh wa ka Them Metor, kawa ymtoh u pynyaphær ko ya ki jaitbru tangwa toh u pait ya i kaam neibynta wow wanrah ya i roi i paar
Da ong u wa ka Them Metor toh ka thaw wa man pyrdi, wei i eh wa chem ki warep toh wow wanrah mar ha Iewduh heiwa da hap ki wow dai lut ya ki mar du neidaw wym em i thaw booh mar namo ka ‘Cold Storage’, wei lada ye wow pynemkaam da ini i thaw daw man i kyrkhu ya ki lak ngut ki warep na kylleiñ ka ri Khasi.
Da ong chooh chooh u wa kamwa man katni ha ini i thaw wow pynyieñ kari leh ym biang wei khamtam ym man i thaw iwa khooid.
U Kharjahrin da pynsñiaw u yei phylla wa em kiwa chongwai kiwa da chong slem ha ini i thaw kiwa da sñiaw tre yei thaw iwa ym sñiaw yahap deiwa pynrap wa ki wakreh sorkar ym em hok ki wow rai heiwon u chong Quarter ki, deiwa ong leh wa i kaam wow kyrriah ya ki bru na Them Metor toh u pyndep noh ha uni u snem.
