Ka Meghalaya Human Rights Commission (MHRC) hadien wa yoh ujor ko haka 05-08-2019 naka Sepolda Syngkli, kawa chong chnong ka Tharia, East Khasi Hills wa u khon ko u (L) Fasting Syngkli da yap u haka 18-08-2018 neidaw wa chah riñ u ha u sainar bordiñ wa tkut (11KV Sohbar Feeder Line) haka sngi wa joor u slap wei da em i thlieh u pyrthat heiwa u khon ko uwa yah yaka Truck wa em ya u number ML 04-7905 da tyngkhooh u ya u uni u sainar bordiñ kamtæ da chah riñ u hadooh wa yap.
Hajrong ini, ka Meghalaya Human Rights Commission (MHRC) da chimkhia ko wow Register yaka Case lyngba ka MHRC Case No. 46/2019 haka 14-08-2019. Ka Commission da yieñ skem ko wa emkaam wow pynman yaka takit hajrong i leh khalær ka chnat wei wow pynkitkhlieh ya ki bru wa emkti ha kani ka kaam kamjooh yow lait u jia biang neini chakhmat. Ya kani ka Case da Register da ka Single Bench wa pait da u Acting Chairperson MHRC, u PJP Hanaman.
Hadien wa boon i pynslem, haka takit (Inquiry Report) naka chnat wa pait ya kani ka kaam da ong wa i jia toh i bor Blai, i wym poi pyrkhat neidaw wa joor u slap wei em u pyrthat iwa man ki daw wa da jia ini. Hajrong ini, ka Commission, haka Division Bench wa kynthup ya u dkhot (Non-Judicial) u PJP Hanaman wa ka dkhot (Judicial), ka Bafindalyne Giri da pynmih hukum haka 10-11-2020 yow phah ya u Law Officer ka Meghalaya Energy Corporation Limited Corporate Affairs yow su T. 1,00,000 cha ka Sepolda Syngkli, ka bei u (L) Fasting Syngkli, kawa da dep e lyngba ka Cheque No. 24132 kawa em tarik 14-12-2020 ka Meghalaya Power Distribution Corporation Limited.
Neiliang ka Commission da pynsñiaw ko yei sihlet wa slem wow ye u pyndep ya kani ka kaam neidaw wa slem wow e yaka Inquiry Report naka chnat.
