Ka Hill Farmers Union (HFU) Central Body da dawa ko na u Montri Rangbah u Conrad K Sangma wa ka sorkar jylla toh u pynboon ko ya ka mang tyngka neibynta ka chnat i rep i riang wei kamjooh leh ya ki chnat sorkar kiwa yatoh wa ki kaam rep.
U President yong ka HFU Central Body u Commander Shangpliang wa u Allfonbirth Kharsyntiew, General Secretary ynne ka sngi da lai yachem ki ya u Conrad Sangma ha kamra krehkaam yong oo deiwa lai rah ya ki 7 tylli ki phang dawa kiwa toh neibynta wow kyntu yaka rep ka riang ha ka jylla waroh kawi.
Napyrdi kini ki 7 tylli ki phang dawa, toh wow pynbna ya u snem 2021 kam u snem ki warep (Year of the Farmers), u yada ya ki warep ha khappood khamtam wa ka Assam nei chah pynsih ki mar rep ha ki pulit Assam.
Da dawa leh wow e bai lutsan ya ki warep ngap kiwa chah pynsih ha ka dngiem. Chooh chooh da dawa leh wow pait ya ki warep kiwa wan na ki nongkyndong cha Shillong da ki kari kamai wa ym chah chim kabu ki haka bai kari heiwa ka seiñ da pynsñiaw ko wa lada i thap bru man ko mar chiteiñ, ki kari kamai ye ki wow chim tam, tangwa lada thap bru kamwa jooh, i bai kari ym toh u tam i.
Najrong kini, da dawa leh wow pynkrehkaam noh yaka Market Intervention Scheme khamtam hawa em i hiar dor ki mar rep. Da kyrpaad leh ya u Montri Rangbah wow kyrpaad ya ka sokar India wow pynbait noh smat yaka yakhih ki warep ha Delhi hajrong ki 3 tylli ki aiñ rep kiwa dang dep pynkrehkaam.
U President ka HFU da pyntip u wa neiliang yong u Conrad Sangma da kular u wow chimkhia hajrong kini ki phang dawa wa da booh da ka seiñ.
