Ka KSU da thoh ko cha u Ramesh Pokhriyal ‘Nishank’, u Education Minister ka India yow thung Vice Chancellor wa thymme ka North Eastern Hill University (NEHU) da Prof. Sherwin May Sungoh.
Ka seiñ da ong ko wa yaka NEHU da seiñ haka 19-07-1973 ha Shillong, Meghalaya wei da man ko ka chlem e sikai kawa da yarap yaka jylla kamjooh kiwi ki jylla ka. Kamtæ da emkaam ya u Vice Chancellor wa biang uwa ye wow kyntu kynrong wow yah yaka University chakhmat.
Da ong ya ini neidaw wa ha kini ki 5 snem hapoh u Prof. S. K. Srivastava kam u Vice Chancellor ka University, kani ka skurbah da hiar bha i kyrdan ko hapoh ka ri kawa da hiar naka kyrdan (Ranking) wa 16 chadooh wa chapoh 50 haka National Institutional Ranking.
Chooh chooh da ong wa da em leh boon ki yakhih pyrchah ya u Prof. S.K. Srivastava nadooh na kiwa lai puræ, kiwa sikai hadooh ki wakreh ka University neidaw wym ye u wow pynbait ya kiwa boon ki kaam kiwa da wanrah hakhmat yong oo.
Kamtæ da ong wa man ko i yukit wa khia bha wow pynbait ya waroh kiwa da leh bakla u Vice Chancellor warim wei u Vice Chancellor thymme emkaam u man uwa chemphang uwa wow pynpoi biang ya kani ka skurbah cha ka luti wa toh kamjooh i burom kani ka thaw wei hajrong ini da tyrwa ya Prof. Sherwin May Sungoh kam Vice Chancellor wa thymme ka North Eastern Hill University wa da mih leh i pyrtuid kam kiwa ye wow man Vice Chancellor wa naka University hi.
