Ha ka 16 tarik uni u bnai ka Self Help Group (SHG) kawa tip kam ka Synroplang SHG kawa em ha ka chnong Raliang, West Jaiñtia Hills District ha dong Pyntei da yoh ko wow wai nyngkong dooh hapoh ka District yaka Menstrual Unit Project “Stree Swabhiman” deiwa yahkhmat wei ya krehlang ka CSC eGovernance deilang waka MSSRLS.
Ka Stree Swabhman toh ka thong krehkaam yow chna ya ki Sanitary Napkin (Sanitary Pads) ya ki kynthai neibynta i chait i khiah kamjooh leh i lehkhooid ki kynthai (Women‘s Health and Hygiene). Man ko leh ka Project kawa thymme ha ka jylla hi. Ya kani ka Project da wai nyngkong dooh da Minister ka ri India u Ravi Shankar Prasad uwa pait ya ka chnat Electronics & IT wa Law and Justice.
Ha kani ka sngi da ya emlang u Deputy Commissioner ka West Jaiñtia Hills District u Garod L.S.N Dykes, IAS kam u kongsan. U Kamailang Garod, Secretary Chnong, u Sanki Lamare, Waheh Chnong ka Raliang, u Rolinstar Shadap, DDM Meghalaya State Rural Livelihoods Society (MSSRLS), u Marda Oo Myrchiang District Manager CSC eGovernance, ka Ameecia Pariat, District Manager CSC eGovernance deilang wa kiwi ki dkhot ka chnong.
U kongsan hei klam da yaroh u yaka Synroplang SHG kamjooh yaka CSC eGovernance wa ka MSSRLS kiwa da ye wow pynman kaam ya ini ha ka chnong kajooh leh ha ka District ha i sien nyngkong neibynta i chait i khiah yong ki khynthai. Da kyntu u leh ya ki kynthai wow man ki kiwa lehkhooid hajrong i chait i khiah yong ki. Deiwa em kini ki kor wow chna Sanitary Pads kiwa ye u chna kyrpang, da pynchlur chooh chooh u ya ki kynthai, ki manbei wow thied ya kini ki Pads kiwa yoh na ka chnong hi ha i dor wa biang wei lyngba ini, daw yarap ko leh ya ki kynthai wa sah cha nyngkyndong. Wei kani daw man ko leh kam ka laad seiñ khih khamtam wa katni wa duna ki kaam sorkar.
