Kam i dak wow pyrchah joor yei chah pynyap kawi ka khynnah skur ha Sohkymphor, East Jaiñtia Hills District, hadien wa dep chah slait bor ko ha ki bru wym pu ye u tip, neiliang ka seiñ Jaiñtia Student Movement, Women’s Wing Central Body, da pynman ko dei thang mombati ynne i janmiet ha Iawmusiang, Jowai wa da embynta lang nadooh kiwa hayung hasem yong ka khynnah, kiwa para lai skur lang ko, kiwa sikai skur yong ka wa kiwi kiwi.
Haka yalang tbian chwa wow thang mombati wa pynlai da u P.S. Phawa u In-charge JSM Jaiñtia Hills. Kiwa e yei klam da pynsñiaw ki yei diaw i sñiawsih ya kam kini ki jait jia wa ktah yei chongsuk chong chngaaiñ ka imlang sahlang, iwa jia khak khak khamtam ya kiwa pli ki khynnah kynthai.
Da ong ki wa ya kam kini ki bru wa emkti, ki wym em sñiaw de yaki para mynsien, ki bor yong ka aiñ toh u chimkhia ki wow thooh u kem, wei u e leh i pynchitom wa saja, khnang wa kani ka khynnah u yoh ko yei hok, wei kamjooh ka imlang sahlang u man chngaaiñ ko.
Neiliang ka General Secretary, Jaiñtia Student Movement, Women’s Wings Central Body, ka Nidaialam Dkhar da beiñ joor ko yaka sorkar deiwa ong wa hadooh ynne ka sngi wada dap chi bnai pura leh ym pu ye ki wow e kawon kawon ka khubor heiyatoh i lai luti yong ki u thooh yaki bru wa emkti.
Khana haroh ko wa neiliang yong ki, man i por da emlang ki wa kiwa hayung hasem kani ka khynnah, wei lai yachem thooh yutip ki leh na u SP ka East Jaiñtia Hills heiyatoh wa ini i jia ya kani ka khynnah.
Kiwi won wa e yei klam kynthup ya u E. Dkhar, General Secretary AJYWO East Jaiñtia, u Ribok Biam, General Secretary, JSM Laskeiñ Circle, u Shnalad Rymbai, President JSM, East Jaiñtia nalor kiwa hayung hasem yong ka, kiwa sikai skur yong ka wa kiwi.
