Hadien 7 bnai, kiwa dang yoh COVID-19 ha India da man ki iwa duna dooh heiwa ha kini ki 24 kynta kiwa dang yoh da em ki 10,064 ngut, kiwa dang chait 17,411 ngut, kiwa dang yap 137 ngut iwa mut wa kiwa dang em ya uni u khñiang da duna ki da 7,484 ngut.
I sien wa khaddooh wa duna kiwa dang yoh kamni toh haka 12-06-20 kiwa em 10,956 ngut. Katwa kiwa dang yap da em ki hapoh 140 ngut hadien 8 bnai heiwa haka 23-05-20 da em 137 ngut kiwa yap.
Iwa boon kiwa chait da pynman ko leh wow pynduna ya kiwa dang em ya uni u khñiang wow jan em hapoh 2 lak ngut kiwa em kattæ 2.05 lak ngut iwa man leh da boon da kiwa yoh dawai yada COVID-19 kiwa da em 4,54,049 ngut.
80% na kiwa dang chait toh kiwa em ha ki 10 tylli ki jylla kiwa boon dooh ha Kerala 3,921 ngut, Maharashtra 3,854 ngut, Chhattisgarh 1,301 ngut, Karnataka 973 ngut, Tamil Nadu 758 ngut, Gujarat 700 ngut, Bihar 676 ngut, Rajasthan 626 ngut, Uttar Pradesh 622 ngut wa ha West Bengal 569 ngut.
72% na kiwa dang yoh toh kiwa em ha ki 6 tylli ki jylla kiwa boon dooh ha Kerala 3,346 ngut, Maharashtra 1,924 ngut, Tamil Nadu 551 ngut, Gujarat 495 ngut, Chhattisgarh 471 ngut wa ha Karnataka 435 ngut.
Waroh kiwa da chait da em ki 96.66% kiwa ku naka 96.59% kiwa em 1,02,28,753 ngut, 1.90% kiwa dang em ya uni u khñiang kiwa hiar naka 1.97% kiwa em 2,00,528 ngut, 1.44% kiwa yap kiwa em 1,52,556 ngut, deilang waroh da poi 1,05,81,837 ngut kiwa da dep yoh ya uni u khñiang hapoh ka ri.
Kiwa chait da tam ki da 1,00,28,225 ngut ya kiwa dang em ya uni u khñiang iwa ku da 24,895 ngut nadooh ynnin ka sngi.
