Ki wakreh ka GVK 108 hapoh ka lama yong ka Meghalaya EMRI Workers Union ynne ka sngi da sdang biang ki ya ka yakhih hadien wa ki bor pynlai katai ka Company wa pynbiang Ambulance kit wakjut ym mano ki yei dawa yong ki wakreh kattu la palat chisnem.
U President ka Union, u Roypar Raswai da ong u wa hadien wa ki wakreh ka GVK EMRI da pynman ki ya ka yakhih ha u snem 2019 hajrong ki 36 tylli ki dawa, heiwa neiliang ka Company da kohngooh ko wow pynmankaam ya ki 8 tylli ki phang dawa, neiliang ki wakreh da sdang biang ki ya i kaam, tangwa kamwa man katni, katai ka Company ym em pynmankaam ko ya kitai ki 8 tylli phang kamwa da kular hadooh katni palat chi snem, iwa da pynman ya ki wakreh wow sdang biang ya ki yakhih.
Ynne ka sngi ki wakreh ka GVK EMRI da pynman ki yei yakhih deiwa lai kjat na pchem yong ka yung krehkaam ka 108 chadooh Motphran wow pynsñiaw yei pyrchah yei mutlop yong kiwa pynlai ya katai ka Company.
U Roykupar da ong u wa ka Contract yong katai ka Company wa ka sorkar daw kut noh ko ha u Wisu (March) uni u snem, wei neiliang yong ki wakreh da dawa ki wow pynyinsur chooh ya ka soskular krehkaam wa katai ka Company, tangwa ka sorkar toh u chimkti wow pynlai hi ko ya katai ka Company neibynta i myntoi ki paidbah.
