Ka Meghalaya da ku cha iwa soo haka Group yong ki haka Syed Mushtaq Ali Trophy T20 Tournament deiwa jop yaka Sikkim da 8 Wicket ynne ka sngi ha Chennai.
Ka Meghalaya da jop ko yaka kylla khlem haka sien wa nyngkong wei da jied ko wow phah Bat chwa yaka Sikkim kawa ye u kamai 111/5 na ki 20 Over heiwa da jop haka 17.3 Over deiwa dooh artylli ki 2 Wicket.
Ini i jop wa le na ki 5 tylli ki yalehke da pynypoi ko yaka Meghalaya cha iwa 4 deiwa yoh 12 Point hadien ka Nagaland kawa pynrem yaka Manipur.
U Varun Sood da lehbha u yaka Sikkim deiwa yoh 60 Run (Not Out) tangwa ya kiwi, kiwa kawang bol ka Meghalaya da ye ki wow pynhaap heiwa u Sanjay Yadav da yoh u 2/24, u Dippu Sangma 1/9, u Chengkam Sangma (1/12) wa u Akash Kumar Choudhary (1/26).
Yei kdong Run da sdang da u Rohit Shah wa u Ravi Teja kiwa da kamai lang 48 Run hadien wa haap u Teja (14) katwa u Shah da lai u wow kamai 38 Run deiwa yohlok lang wa u Punit Bisht uwa da kamai 41 not out na ki 27 bol. U Shah da haap u haka Over wa 13, heiwa da wan u Yadav yow pynyohlok ya u Bisht uwa da kamai 11 Not Out yow pynjop yaka Meghalaya kawa yoh 112/2 deiwa sah sa 15 bol.
Hanla em 8 tylli ki Team ha kawi ka Group tangwa hap ki wow yaleh 5 tylli ki yalehke. Ka Meghalaya da pynkut ko ya kani ka Tournament deiwa jop le sien wei rem arsien deiwa em leh hakhmat ka Manipur kawa yoh 8 Point.
