Hajrong ka yurim wow thooh laad kammon yow pynneh pynsah yaka wah Myntdu kawa psa um-baam um-dih wei kawa kær soodong yaka chnong Jowai, da seiñ daka “Khuid Ya Ka Wah Myntdu” haka yalang wada khut pynman da u Khroo Lamsalanki Pariat wa u Dapherborn Suchiang.
U Khroo Lamsalanki Pariat da ong u i daw wa pynman yaki u khut ya kani ka yachem yumut toh hadien wa yoo ki yei chah ktah ka wah Myntdu iwa da riñ tlot yaka kat nang lai ki por ki snem, nalor i chah ktah heiyatoh wei khooid i jngiar.
Hei lai sylli yong oo ha kini ki kajiak sngi, khana u wa na i thaw wa mih ka wah na chnong Mihmyntdu, ka um khlan ko wei khooid, tangwa nadooh i thaw wa yachem ko waka liar wa wan na Reserve wa Tyrchi chawah, da sdang mih ki tngit wa boonjait wa kynthup ki Plastic, wei nadooh ka yingkieñ Myntdu Pynthor Neiñ won da nangkhian-nangkhian wei tngit ko.
Chooh chooh ong u wa i pyntooid yaki khyndaw cha ki wah leh toh kawi naki daw wa pyntlot yei bor yong ka um, wei hanla neiliang ki bor yong ka chnat PWD (Road) da booh ki yei maham wymhoi u noh khyndaw næ jhep, ki paidbah won ym ap ki.
“Kamtæ i kam kiwa chong chnong wa chaniah um naka wah Myntdu toh u pyrkhat i wa iyi i kamram yong i wow leh khnang yow dap um khamtam heipor tlang,” ong u K.L. Pariat.
Ha ka yalang da jied ya u Khroo Lamsalanki Pariat kam u Chairman, Vice Chairman u A. Lypon, u General Secretary u Dapherborn Suchiang, Assistant General Secretary u Kyllimot Lhuid, Treasurer u Oriland Shylla deilang waki 13 ngut ki Executive Member wa kynthup ya u Riquoma Rq Laloo, u Edelweiss R Dkhar, ka Dayoo Iakai, ka Valen Shylla, u Dame H Pde, u Albert Terence Gatphoh, u Sienwanmiki Bareh, u Phrangsngi Sutnga, ka Manda Bareh, ka Rinibeth Patlong, u Donkupar Syngkrem, ka Neelam Passah waka Hunbeitki Dkhar.
Hadien wada dep pynskem ya kiwa kitkaam kani ka kynhun, da chim leh yaka rai wow lai pynsñiawthooh cha man ki chnong hajrong i emkaam u pynman yaka wah Myntdu kawa khooid.
Heijooh i por ka sorkar leh toh u pynkrehkaam hok ko yaka hukum yong ka NGT.
