Ka Ministry of Fisheries, Animal Husbandry & Dairying ka sorkar Indai da pyntip ko wa hadooh ynne ka sngi, i kjut khlam ki syiar namo ka Avian Influenza da pyntikna ya ka ha ki 6 tylli ki jylla kiwa kynthup ya ka Kerala, Haryana, Madhya Pradesh, Maharashtra, Chhattisgarh wa Punjab heiwa da chem ha ki syiar wa psan wow baam (Poultry Bird) wa yap ki.
Ya ini i kjut da pyntikna wa da chem ha ki la-ty’ab (Crow), ki sim wa uiñ (Migratory) wa ki sim khloo (Wild Birds) ha ki 10 tylli ki jylla wa kynthup ya ka Madhya Pradesh, Maharashtra, Chhattisgarh, Himachal Pradesh, Gujarat, Uttar Pradesh, Uttarakhand, Delhi, Rajasthan wa Punjab.
Chooh chooh da pyntip leh wa i khang yei poor namo Control and Containment Operation ha ki thaw wa sdang kani ka kjut (Epicenter) da sdang ha ka jylla Maharashtra, Madhya Pradesh, Chhattisgarh wa Haryana.
Da sdang leh ya ka dhab ki bru chemphang na ka sorkar pyrdi wow booddien yei man i long ha ki chnong kam ha Satara, Latur, Parbhani wa Beed District ka Maharashtra.
Heijooh i por da kyntu leh ya waroh ki jylla wow pyntip cha ki chnat ka sorkar pyrdi hajrong ki kaam wa da leh ki wow yada nei poor kani ka kjut khlam wa kiwi kiwi.
