Ka Confederation of Meghalaya Social Oganisation (CoMSO) ynne ka sngi da pynman ko da i thang mombati kam i dak yakhih wow pynyoo yei pyrchah wei sñiawsih ha ka sngi wa lehkmen yei dap 49 snem wa da yoh ya ka jylla. Ya kani ka yakhih ka CoMSO da e pyrtuid da ‘Ka Sngi Ba Sngewsih ia ka Mynthi ki Korbar Ri’.
Ha kani ka sngi neiliang ki dkhot ka CoMSO kiwa da yalang ha Madan Malki, Shillong da kynmoo tympang leh ya ki kaam wa khroo yong kiwa yaleh yow pynyoh jylla yong i, heiwa da thang ya ki mombati wei kamjooh leh deiwa thap kti yeiwa mylliñ ki ya idæ hawa yaleh wow yoh jylla.
U Chairman ka CoMSO, u Robertjune Kharjahrin da ong u wa ki seiñbhalang da pynsñiaw ki yei sñiawngooh ya waroh ki bru kiwa yaleh kiwa da pynyoh ya ka jylla, deiwa pynrap wa kam kiwa yahkhmat daw pyrchang wei wow bood yaki dak kjat yong kiwa yaleh kammon wow yaksaid wei yakhun wei wow krehchitom u pynneh pynsah yei man kyrpang i khyndaw u chyiap, ka riti dustur wa ka ktien ka thylliej yong ka jaitbru.
Da ong u wa wot hadien wa da yoh ya ka jylla yong i hi, da em kiyi kiyi kiwa pynman yaki paidbah wow chrai wow sñiawsih, deiwa ong leh wa da em ki sorkar wa kiwa chna aiñ kiwa da wanrah ya ki aiñ kiwa da e myntoi ya ka jylla, kam ka Meghalaya Reservation Policy, ka Meghalaya Land Transfer Act wa kiwi ki aiñ, tangwa lada kyruiñ won cha ki bynta wa emkaam kam ki aiñ wow yada ya ka jaitbru kam ka ILP ym pu em mankaam ko.
U Kharjahrin da pynsñiaw u yei sñiawngooh leh ya ki 60 ngut ki MLA kiwa da mynjur ya ka Resolution wow dawa ILP, tangwa da ong u wa ka yakhun hadooh katni ym pu kut, wei man ko kawa sñiawsih wa ha ka rta kawa 49 snem, ka jylla ym pu em ko ya u pood u ang wa biang, wei i angnood wow pynpsiah yaka ktien Khasi ha ka 8th Schedule leh ym pu mankaam ko hadooh katni.
