Ka chnong Lama, East Jaiñtia Hills District da pynche paidbah ko hajrong i pynbaad wa kyntait chnong ya kawi ka manbei kawa tip pyrtuid kam ka Thrina Suchen kawa chong wa sah haka chnong Lama.
Ka chnong da ong ko wa kani ka kong rap phær ko hawa nujor wa kiwi ki para chnong kawa ym jooh chimbynta lane ya krehlang wa ka chnong, kamtæ na ini i daw wa pynbaad ko yaka chnong khlem da ye wow pynyoo yaki sabut kiwa biang, kamtæ da beiñ joor ya kani ka manbei kawa da pynbaad da iwa ym em man sakhiat wa kawa ym em yurim.
Kam kiwa yahkhmat yaka chnong ym em ki ya itæ i mynsien wow lehbeiñ ya kiwon kiwon lane ya uwon uwon lane wow beh ya kiwon kiwon næ yaka Thrina Suchen kawa da yoh ya jar jiar i bhah, i bynta wa ka sorkar e ko kam u khoo, chini ter ter.
Kamtæ da ong wa lada ka Thrina ye ko wow pynyoo da ki dak ki chin wa biang hajrong i chah kyntait chnong deiwa pynyoo leh da ki sabut kiwa biang hajrong i chah kyntait chnong, ye ko wow ujor syndon cha ki bor yong ka aiñ wei kam ka chnong leh pdiang ki ya ini wei burom ki leh yaka aiñ, pynkut ka kyrwoh na u Waheh Chnong u Tellme Dong wa u Secretary Chnong u Charling Syrti.
