Ka seiñ Hynniewtrep Youth Council (HYC) Narpuh Circle, ynnin ka 21 tarik hapoh i yahkhmat u President u Keldrim Sumer da lai hiar ki cha ka chnong Shymplong mar ya yoh yutip ki wa iñ wei pdung ka tadong chet (Gas Cylinder) ha i yung ka Juhlangki Syih iwa da jia heipor 19 tarik i janmiet heipor kamwa 5:00 waje tangwa da embhah wa ym em wa mynsoo.
Kamtæ neiliang ka HYC Narpuh Circle da lai e ko yaki kti yarap hanla man ko leh iwa khian heiwa da e da ki tiar ki tar kam ki dabor, khuri borti, ki kchu chet, ki syiang wa u chylliah.
Haka yalamg wa tbian kawa da emlang u Secretary Chnong u Pherbak Lamare wa ki dkhot ka chnong, da pynsñiaw u yei sñiawngooh yaka seiñ kawa da smat wow e yarap cha kani ka manyung katwa kynjoh i bor yong ki wei da kitbok kitrwiang u leh yaka seiñ wow nang ye chooh chooh ko neini chakhmat wow leh yaki kaam wabha hapoh ka thaaiñ.
Neiliang ki tre yung leh da pynsñiaw ki yei sñiawngooh yaka seiñ deiwa kitbok kitrwiang yaka seiñ yaki kaam yong ka neini chakhmat.
Neiliang u President u K. Sumer da ong u wa neiliang ka seiñ daw thooh laad ko wa kammon wow yarap da ki laad kiwa rap heh. Da pynwai yaka yalang da i duwai na u M. Wahlang.
Ka kyrwoh na u P. Syiemlieh, Publicity Secretary.
