Ynnin ka sngi, ka Meghalaya People’s United Front (MPUF) Shangpung Unit hapoh i yahkhmat u General Secretary yong ka u Kenneth Anderson Iakai deiwa synran lang u General Secretary yong ka Laskeiñ Block Circle u Sonysan Wann wa ki kattu katni ngut ki dkhot da lai yachem ki ya u Manager wa pait yaka Jio ha ka yung krehkaam kani ka Company wa em ha OK Complex Building, Ladthadlaboh, Jowai.
Ka seiñ MPUF da booh syndon ko da ka ujor ha u Manager neidaw wa da chem chitom ki paidbah ha kini ki sngi wa joor thut ka Network iwa da booh hei eh ya kiwa boon nadooh ki khynnah skur kiwa leh yaka Online Class, ki yung krehkaam kamjooh yaki paidbah waroh kiwa pynemkaam Internet.
Neiliang ka seiñ da kylli ko na u Manager wa neiyi i daw wa heipor wa dooh bordiñ, ka Network leh duna wei em ki por hadooh dei wiar hiwot ko heiwa neiliang u Manager da pyntip u wa ym tip u chaphang ka thaaiñ Shangpung neidaw wa oo toh uwa dang wan psiah kreh dang ini wei da kular u wow chimkhia wow phah ya ki wakreh wow pynbiang yaka Network.
Neiliang u Publicity Secretary u Ebormi S Passah da ong u wa da e laad ya u Manager hapoh chi tayaw wow pynbiang heiyatoh wa ka Jio Network wei lym kamtæ ka seiñ daw leh ko ya iwa emkaam.
