Ka Campus wa thymme yong ka Industrial Training Institute (ITI), Sohra kawa em hapoh i pait i yoo ka Directorate of Employment & Craftsmen Training, Labour Department da wan wai ya ka da u montri rangbah ka jylla, u Conrad K. Sangma, ynnin ka 22 tarik.
Ha kani ka sngi da emlang u symbood montri rangbah ka jylla u Prestone Tynsong, u MLA ka Shella u Balajied Kupar Synrem, u MLA ka Sohra u Gavin Miguel Mylliem wa kiwi kiwi.
U Conrad hawa e yei klam da yaroh u ya ka chnat Labour kawa da kreh khlem sangeh wow chna pyndep ya kani ka ITI Campus ha Sohra i wow yarap ya ki khynroo khyllood ka jylla.
Da ong u leh wa ka jylla em ko kamwa 12 lak ngut ki khynroo khyllood kiwa em hapyrdi 15 wa 30 snem i rta, kiwa man 31% na i em bru ka jylla heiwa 50,000 ngut toh kiwa da sdang thooh kreh man-u-snem iwa mut wa emkaam u chna kreh 50,000 tylli ha ka chi snem.
Da ong u leh wa ka jylla man ko kawa dang khian i rta kawa em i tlot wa i bor wa ha rukom, tangwa ki khynroo wow yah ya ka, wei i kaamram ka jylla wow kdaw luti ya ki weiwa kani ka ITI Campus ha Sohra toh kawi na ki.
Chooh chooh da ong u wa ka sorkar angnood ko wow booh Policy wow esikai ya ki khynroo ha kiwa boon ki liang wei ka sorkar thrang ko wow esikai ya ki khynroo wow yoh kreh ki ha ki kaam wa sdang ki bru samen.
Ya kani ka ITI, Sohra Campus da chna hapoh ka Project- Supporting Human Capital Development in Meghalaya yong ka ADB hei lut iwa T. 3.63 klur wa T. 95 lak hapoh ka Enhancing Skill Development Infrastructure in NE States (ESDI).
Ya ka ITI, Sohra da sdang nadooh u 2011 ha i yung wai heiwa da esikai du ha ka Wireman.
Ka ESDI Scheme ya kawa da sdang ha u 2017 da wanrah ya 3 tylli ki esikai wa kynthup ya ka Mason (Building Constructor), Office Assistant cum Computer Operator wa General Painter.
Ya i kreh ya kani ka yung thymme da sdang ha u 2017 heiwa da wanrah chooh sa ya i esikai Catering & Hospitality.
Ha kani ka sngi da pynkup burom leh ya kiwa da pyndep yaka puræ puthi na kani ka thaw.
