Ha ka 23 tarik uni u bnai, ka Synjuk Ki Waheh Shnong Ri Jaintia (SWSRJ) da pynyaar ko ya ka chnat krehkaam yong ka, kawa tip pyrtuid ka Mynsngat-Namdong-Khanduli Area, Headquarter Namdong. Da pynbaam smai ya kiwa kitkaam da u President Waheh yong ka Synjuk u A. Lipon hei ya emlang ki dkhot ka Governing Body ka Synjuk u B. Shylla, u W. Rymbui wa kiwi.
Kiwa kitkaam kani ka chnat thymme kiwa da baamsmai man ki kamni ha wah:
President- Yeoshida Nongspung
Vice President- Knerlang Siangshai
Secretary- Damonmi Dkhar
Assistant Secretary- Marbud Phawa
Treasurer- DV Sutnga
Auditors- Nilan Dkhar, Apostol Shadap wei da em leh 16 ngut ki Executive Members.
Kani ka chnat yong ka Synjuk u krehkaam pura ko ha waroh ki dong ki chnong ka thaaiñ nadooh Mynsngat, Namdong hadooh ki thaaiñ Khanduli.
Da pynmih pynkha ya kani ka chnat ka Synjuk yow pait u sylli wei u kit u bah yei eh yong waroh kawi ka thaaiñ nadooh ki kaam pynbait ya u pood u ang yong ki ar jylla kitæ ka Meghalaya wa ka Assam, ki kaam dawa C&RD Block wa i krehkaam kiwi ki chnat sorkar nadooh ki kaam rep kaam riang, ki um-baam um-dih, ki sarok, i chait i khiah ter ter.
Hadien wada yoh ya ki kyntien sneiñ, kyntien kyrkhu kyrdoh, ki pynche ya ki kaam wow krehkaam kiwa yahkhmat kamjooh ya kiwa kitkaam na u President Waheh ka SWSRJ u A. Lipon, ki dkhot da iwi i yumut da chim ki ya i kular wow ya kreh wei wow kyrchaan yieñ tylli yei thmu yong ka synjuk ha kam kini ki por wa ka ri, waka jaitbru ha ri loom Jaiñtia da sdang ko u chah pynwit pynthut ha kiwi tawan ki jaitbru khamtam ha ki thaw khappood khapsam.
Kamtæ ka synjuk da khutlang ko ya waroh ki khroo pyrkhat ka thaaiñ wow ya pachat u pynwandur ya ka imlang sahlang ha ka Tipbru Tip Blai, ka roi ka paar, ka yoh ka kot ha ki liang waroh neini chaphrang u “Yabeh yaka wa bha” ki ktien imsngi ka Synjuk, pynkut ka kyrwoh na u General Secretary ka SWSRJ u B. Shylla.
