Ka seiñ Confederation of Hynñiewtrep People (COHP) haka khubor wada pynlait, da ong ko wa em ki dkhot ka Village Water and Sanitation Committee (VWSC) ka Mihmyntdu kiwa kular u e biang ya ka Scheme chna paikhana kawa da pynlait daka chnat PHE Rural Water Supply nadooh u snem 2017. Iwa hei sakhiat kani ka Scheme toh u pyndep nadooh u snem 2017 hi.
Da ong wa lyngba ka RTI da chem waka Scheme chna paikhana da dep pyllait lut haka 30-03-2017, wei katkam ka Work Order toh u pyndep hapoh 30 sngi nadooh wa yoh yaka Order.
Pynsñiaw won ki leh yei phylla wa kammon kiwa krehkaam katai ka Committee nood ki wow pynbiej deiwa ong wa daw e biang hawa katni da mih da kawi won ka Scheme Individual Household Latrine (IHHL), ka Left out Baseline, kawa T. 12,000 chi yung, wada pynlait yaka 1st Installment naka PHE Rural Water Supply ha ka 01-08-2019.
Chooh chooh da ong wa hei sakhiat ka Work Order wa T. 82,80,000 toh neibynta ki 3066 ki manyung wa toh u yoh ki T. 2700 chi yung katkam ka kyndon (Guidelines) yong ka Scheme warim ka TSC. Da pynbaad ki wa ini toh i leh thurmur wa wot tang yeiwa rim leh wym pu dep ki wow pynkreh kammon ye ki u yoh biang da kawi won ka Scheme.
Neiliang ka seiñ booh ko yei kylli haroh ko yaka chnat PHE, wa da dep lai pait ko mo kut thlu yung yaki bru wa em pyrtuid kam kiwa yoh myntoi chwa u pynlait ya ka Scheme thymme.
Heijooh i por booh da kylli haroh ya u Block Coordinator uwa toh u pait yaka Scheme chna paikhana ha chnong Mihmyntdu, wa oo da dep lai pait ne booddien bniah hi u mo yaki manyung wa em pyrtuid haka List chwa u pynlait ya ka posa waroh.
Hajrong kayi ka yurim e Report u cha ka PHE Rural Water Supply, Jowai yow pynlait ko yaka poisa yong kani ka Scheme, wei em hi u mo ki sakhi sabut wada dep pynkreh lut ya kani ka Scheme, pynkut ka kyrwoh khubor naka COHP.
