Ki dkhot ka seiñ Khooid Ya Ka Myntdu chirrup ki manbei manpa wa ki khon khynroo khyllood kiwa em i sñiawkhia yei man ka wah Myntdu ha ka sngi Mulong 30 tarik Duiatra da pynman ki yei li pait li sylli ya ka wah Myntdu nadooh na chnong Mihmyntdu tymbud hadooh i bynta ka Pynthorneiñ.
Heini i li pait li sylli tymbud ka wah Myntdu, ki dkhot da chem wei da yoo da sakhi ki leh da ki khmat yei chah ktah i man ka wah Myntdu wei iwa ye leh u man i maa wa yang yei khooid i suba ka um, wei i tynjooh ya ka chnong Jowai ha ki snem wow wan lada ym em i chimkhia neiliang ki bor sorkar næ ki bru wa chong chnong wow leh yeiwa emkaam.
Neiliang ki dkhot ka seiñ da ong wa i chna ya u sarok Bypass toh man ko kawi na ki daw wa booh hei maa ya ka wah Myntdu neibhah katkam ki dak ki chin da yoo wa em ki bynta yong uni u sarok da theh da noh khyndaw khlem da pait næ pyrkhat yei man ka wah.
Heini i ya lai tymbud ka wah Myntdu da chem leh wa em ki thaw wa ki Band-um man ki kiwa da chah pynjæd pynpra wei ini ktah bha i ya ki bru warep cha kini ki thaw neibhah ka um watoh u poi cha ki hali yong ki da dooh da kut.
Hei yaklam wa u Khroo Lamsalanki Pariat, Chairman yong ka seiñ Khooid Ya Ka Myntdu, da ong u wa ini i lai man i chibynta wow yoh sakhiat ki dkhot u yoo u sakhi yei man ka wah Myntdu wei kiyi ki daw wa pynman ya ka wow khian, u tngit u jakhlia ko. Hadien ini i yalai ki dkhot wa hakhmat ka seiñ daw chong pyrkhat won ki iyi ki bor watoh u leh hei wow yada yei man ka wah Myntdu lynter.
