Da u Shimphang Lyngdoh
Hadooh 30 snem lynter wada wiar luti,
Hei doom ka Raij da sah khonswet-rangli;
Khlem kyrpaad khlem mane chooh i’u Blai,
Ya pra ki khon ka Raij la kam ki masi dat-rai.
Na ki sookur sookpoh wa ksoh ya ka niam,
Lehniam lehrukom wym em de wa kdup wa piam;
Ki khon Niamtre wa em hapoh ka Raij,
Cha kpær para da ya psiah ki katwa ngait.
Neiyi ma-ai i daw wa jia kamni?
Wa ieh syndet kiwa yalam ha kitu ki sngi;
Khlem pait khlem chare ya ka niam ka rukom,
Yoh laad ki yong para u prong u thom.
Related posts
Ini wada jia waroh pynpyrkhat ko ya i,
Yoh u sdang lithooh ki laad ki luti;
Ha u dohnood kiwa yalam sdang psiah ka spah mynsien,
Ya ka niam ka rukom u pynkhai im biang sa chisien.
Ha u snem 2014 che thaba biang ka sngi,
Ki waheh wasian da chem laad chem luti;
Ha u snem 2015 da pynyoo ki dei kaam,
Deiwa tipbru tipblai ktien Blai da yoh biang u saam.
Na duwan-dupad ksiar khai ki pyrnah-pyrjin,
Cha ki thaw kñia thaw khriam u lai pyndep bin-pa-bin;
U ryngkaw u samun da khyrngiat thiah khyrngiat chong,
Da ka ngooh ka dem na ki da paan da ong.
Khad-ar khad-le ki Blai da ya baam wasuk wasaiñ,
Ha ka Raij wan biang i im wa chngaaiñ;
La ynru sien kattu da yieñ sakhi biang ka Raij,
U Tre-Kirot wa booh wa thaw najrong wa pait.
Da kawi ka buit ka bor da yieñ tylli,
Ki kaam wa bha wa miat yow ye u chakri;
Ka niam ka rukom yoh u neh u sah,
Hadien wada pynthymme biang yei wada sah chrah.
Ka bichaar bichong da phooh da phieñ,
Sdang bna i naam kylleiñ kylleiñ;
I chakri niam da leh thop-pa-thop,
Lympung wa 24 da man kawa jop.
(Kani ka poitri mut ko du neibynta ka Raij Rangad donhi. Kiwi ki ar wym hoi u em ki yei sñiaw)
