Kiwa kamai kari hapoh ka jylla ynne ka sngi da rai ki wow sangeh kamai khlem booh por nadooh ka 3 tarik uni u bnai neidaw wym sñiaw im de i dor bai kari neidaw wa da ku dor ware i phniang (Petrol).
Ini i rai toh hadien wym hun ki ya i yachem wa u Symbood Montri Rangbah, u Prestone Tynsong ynne ka sngi heiwa ka sorkar ym em u rai ko iwon iwon hajrong ini i dawa.
U Chairman ka Meghalaya of Joint Action Committee Commercial Vehicles, u Wandonbok Jyrwa da ong u wa kiwa kamai kari da yachem ko chiboon i eh i khoo nadooh wa wan ka Lockdown neibhah wa hap su bait ki ya ka dan cha ka sorkar hanla ym em kamai ki, wot hadooh kini ki sngi wa haap ki u kamai sngi pood katkam ka Odd wa Even Number.
Da ong u wa i sangeh kamai u kynthup i ya ki Bus wa Taxi deiwa kyntu leh ya waroh ki tre wa kiwa kamai kari wow krehlang hadooh wa da ye u pynbait yeini.
U Jyrwa da ong u wa lada em ki kari kiwa leh pyrchah ya ini i yakhih ki kari kamai, neiliang ka seiñ ymye ko wow bahkhlieh ya ki lada em iwon iwon iwa jia.
Hawa kylli, da ong u wa ini i yakhih u kynthup i ya waroh kawi ka jylla, lait noh ki kari soo kiwa man ki kari wa pynlai da ka sorkar.
Da pyntip u leh wa i ku dor i phniang kari toh neidaw wa ka sorkar chim dan ko hadooh T. 31 chi liter iwa da ktah ya waroh ki kari deiwa ong leh wa ini chim dan deiwa heh ympu che ware i.
