Ka yakhih deiwa sangeh kamai kari wa khut da ka Meghalaya Joint Action Committee of Commercial Vehicles da lai bait ko ynne ka sngi ha Shillong heiwa da sakhi yei ya krehlang yong waroh kiwa yah kari hadooh ki paidbah.
Ha kani ka sngi sdang yong i sangeh kamai wa khlem booh por da sakhi yei kyllooid ki sarok ha kylleiñ ki thaw, wei neiliang ka sorkar da sai ko da ki Bus yong ka Meghalaya Transport Corporation yow kit ya ki paidbah cha kiwa boon ki chnong wa kyntoit ha sor Shillong wa cha khap sor. Da sakhi leh wa em ki kari Tourist Taxi kiwa kit ya ki paidbah na ki kattu katni ki thaw ki yaw.
Kam wow pynkynmoo wa kiwa yah kari kamai da rai ki wow pynman yei sangeh kamai kawa khlem booh por katwa ka sorkar ym pu ye ko wow pynbait yei dawa khamtam hawa yatoh wa i ku dor i phniang kari (Petrol/Diesel) iwa da pynman ya kiwa yah kari wow chim tam ya i dor.
Neiliang kiwa yahkhmat ka JAC da dep ki wow yachem wa u Symbood Montri Rangbah ka jylla, u Prestone Tynsong yow pynsñiaw yei dawa, tangwa ha itai i yachem kawa da pynman haka 1 tarik uni u bnai ym man ko kawa mih soh heiwa ka sorkar ym em kular ko iyi iyi leh iwa da pynman yaka JAC wow lai chakhmat deiwa yakhih hadooh wa ka sorkar u khut ko u yaklam pynbait thymme.
