Ka seiñ JSU lyngba ka Shillong Circle da kyntu ko ya ki paidbah wa emkaam wow kyrchaan ya ka Meghalaya Joint Action Committee of Commercial Vehicles hajrong i sangeh kamai yong ki kari nei ku dor i phniang palat pood.
Ka seiñ lyngba u General Secretary ka Shillong Circle u Request Pakma da ong u wa i leh ka sorkar wow pynku dor ya i phniang da ktah joor i ym du ya kiwa dooh tangwa wot ki khynnah puræ leh.
Da pynkynmoo u wa nachwa ki khynnah kiwa puræ ha Jowai na Ummulong haap su ki du T. 10 samen tangwa katni hadooh T. 50, ka bai kari hapoh sor kam na Madanrting cha Khyndailad ki paidbah haap su ki hadooh T. 50 samen wei ini da ktah bha i ya kiwa mylla sngi.
U Request Pakma da ong u leh wa ka sorkar toh u pynhiar ko yei dor i phniang kari wei ymtoh wow chim ya ka dan wa heh neibynta i bha i miat kiwa dooh wa ki khynnah skur.
