Ka Hynñiewtrep Youths’ Council (HYC) Sohïong Circle, ynnin ka 4 tarik da lai pait ko yei oor i kynroh yong u sarok bah Shillong-Nongstoiñ- Tura iwa da haap ha Sohïong.
Itai i kynroh wa oor toh iwa em ha Sohïong wei da haap i nadooh ki por lyiur yong u snem 2020 wei da tymmoh i mar chiteiñ ya u sarok wei da em i ha i thaw wa dong kamjooh i thaw wa jooh jia bha i mynsoo hadooh kattæ kattæ ha waroh arliang i thaw wa oor wei man i leh i thaw wa jooh pynhær kari ki bru.
Tangwa neiliang ka seiñ da dap ko dei lyngngoh wa khroo hajrong i chong klikti yong ka chnat PWD khamjooh leh yong ka sorkar Meghalaya kawa hadooh katni leh ym pu leh ko iyi iyi leh.
Ka seiñ lyngba u President, u Purningstar Shabong da dawa ko na ka chnat PWD kamjooh leh na ka sorkar wa ka toh u phah chna noh syndon ya katai ka kynroh wei lada ym chna toh u chim ko yei kitkhlieh lada em iwon iwon i jia wa sñiawsih kam i ya tyngkhooh kari næ i mynsoo ha katai ka thaw.
Ha i jooh i por, ka seiñ ka kyntu ko leh ya ka sorkar næ ya ka PWD wa lada em iyi iyi i daw wa pynman ya ka wym ye u kreh rap smat. Toh u thooh laad thooh luti wow pynsmat u chna noh khnang wa ym booh yei maa yaki paidbah kiwa lai wa wan lyngba utai u sarok bah.
