Ka Khasi Students Union (KSU) Lapangap Unit da pynsñiaw ko yei sñiawkhia hajrong i wym burom wei wym bna ka ka sorkar Assam yaka chithi wa da phah da u DC ka West Jaiñtia Hills District cha U DC ka West Karbi Anglong District Assam.
U DC ka West Jaiñtia Hills ha ka chithi wa da phah cha u DC ka West Karbi Anglong da pyntip u wa kiwa chong chnong ka Lapangap da tyrwa ki wow mih paidbah lang neibynta wow chna pynmiat ya u sarok na Khanduli chadooh cha Lapangap haka 4 tarik wei ya ini toh iwa da dep yaklam hei yachem ki DC waki SP.
Tangwa ynnin ka sngi manda ki paidbah da mih ki neibynta wow pynchna ya u sarok, syndet da wan ki pulit Assam kiwa da pynsangeh yabor yaki paidbah kiwa da thmu wow pynchna ya utai u sarok wot hadien wa da dep pyntip chwa da u DC ka West Jaiñtia Hills.
Kamtæ ka KSU da kyntu ko yaki bor sorkar wow sñiawbha ki wow tuklar smat khnang wa ki paidbah u yohlaad ki wow pynchna ya utai u sarok yow lait ki u chem chitom hei lai i wan, i kit i bah.
Ka seiñ da pynsñiaw ko leh yei phylla wa kammon ki bor District ka West Jaiñtia Hills e laad ki yaka Assam wow pynkreh thij ya u sarok uwa haap hapoh u pood u ang ka jylla katwa yaki paidbah ka chnong Lapangap won da chah khanglaad ki haki pulit Assam hanla da dep u DC wow pyntip chwa cha ka Assam.
