Ka Hynñiewtrep National People Federation (HNPF) da e ko yei kyrchaan wa pura yei yakhih yong ka Meghalaya Joint Action Committee of Commercial Vehicle hajrong i ku dor i Petrol wa i Diesel iwa da ktah ya kiwa dooh wa duk, kiwa ya beh yaw na wi cha wi yow dai yaki mar ki mata ha ki yaw ki haat ki waphær waphær.
Na kini ki daw, ka seiñ da kyntu ko ya ka sorkar wow chimkhia noh u pynhiar dor smat yei phniang khnang wa ki paidbah u yoh ki u lai u wan u likhih likhan kamwa jooh man.
Ka seiñ heijooh i por da kyntu ko ya ki para seiñbhalang wow ya krehlang hajrong i leh yong ka sorkar wei lada ka sorkar ym ap ko yeiwa angnood yong ki paidbah, ka seiñ kyntu ko ya ki para seiñ wow pynkhreh ya i yakhih wa rap eh.
Neibhah hawa pait ya ki bru yong i kiwa em cha ki thaaiñ nongkyndong da yoo wa chem chitom ki hadooh kattæ kattæ, khamtam hei kjut hei chitom neidaw wym yoh kari ki hei wow lai thooh dawai na ki Hospital wa em cha sor. Kamtæ ka seiñ da ong ko wa ini i leh ka sorkar ym pyrkhat de ko ya ini heiwa du ha ki por Election donhi wa tipmit ko ya ki bru wa dooh wa duk, tangwa manda yoh ki ha i bor da kheiñ ko ya ki bru yong i la kam ki wym em dor iyi iyi leh.
