Ki ar tylli ki Village Organisation (VO) ha Cham Cham, East Jaiñtia Hills da pynman ki ya i pynkhooid chnong ynne ka sngi heiwa da wan chimbynta da waroh ki dkhot yong kini ki VO kiwa em hapoh ka chnong kiwa kynthup ya ka Nangkiew Shaphrang VO wa ka Iaseiñlang VO.
Ha kani ka sngi daman i pynkhooid iwa chongchit heiwa waroh ki dkhot wa wan da wan ki na ki 32 tylli ki SHG kiwa haap hapoh kini ki VO ka Cham Cham.
Ha kani ka sngi da sdang ya i pynkhooid nadooh na chnong Cham Cham ha waroh soodong ka chnong hadooh wa poi cha Sahksaw, kchaaid Rynji kiwa man ki thaw wa yoosuk kiwa da riñ bha ya kiwa uiñke katni.
Neliang ki VO kiwa em hapoh ka chnong Cham Cham da kyrpaad ki ya ki dkhot kamjooh ki manbei manpa wa ki khynnah leh kamjooh wow man ki kiwa lehkhooid la ha yung ha sem cha luti syngkieñ wei wow em i kitkhlieh ha i uwi pa kawi u pynneh yei khooid i jngiar nadooh na yung kamjooh leh cha lait.
Da kyntu leh ya ki lok ki jor kiwa wan uiñke suwari cha ka chnong wow man kiwa lehkhooid wei ymhoi u nohroi ya ki Plastic, ki jakhlia kat cha wa yoh wei wow sñiawbha noh ha ki Dustbin kiwa booh neibhah da em ki thaw wa da pynkhreh ka chnong neibynta wow noh jhep.
Kani toh katkam ka wyrta na ki ar tylli ki VO, lyngba ka Khlung Dkhar, Secretary Nangkiew Shaphrang VO, ka Tharly Dkhar President Nangkiew VO, ka Arnity Kyndait Secretary Iaseiñlang VO wa na ka Thrang Phawa President Iaseiñlang VO.
