Ynne ka sngi u montri rangbah ka jylla, u Conrad K. Sangma chirup wa u lamphang ka yung dorbar chna aiñ ka jylla, u Metbah Lyngdoh da yachem ki ya ka montri ki kaam poisa tyngka ka sorkar pyrdi, ka Nirmala Sitharaman ha nongbah New Delhi wow paan yarap heiyatoh wa ki kreh hapoh ka “Special Central Assistance”.
Ha ka yalang, neiliang u Conrad da pynsñiaw u ya ki kreh hajrong ka Water Supply Scheme ka Tura, Nongstoin wa ka Greater Shillong, wa i kreh harong ka yung dorbar chna aiñ namo ka Assembly Building wa thymme wa ki skur Residential Schools.
Neiliang ka sorkar jylla da paan yarap ko hadooh T. 200 klur wow pyndep ya ki kreh wa sahteiñ ha ka jylla.
U Conrad da kyrpaad u leh ya ka montri wow chimkhia wow pynsuk ya ki kaam ki SHG ha ki Bank.
Ynne ka sngi u Conrad da yachem u leh wa u montri ka DoNER, u Dr. Jitendra Singh; u montri ka chnat rel, u Piyush Goyal, u montri ka chnat Tribal Affairs, u Arjun Munda wa kiwi kiwi.
Da yachem ki montri ka jylla leh wa u montri ki sorkar pyrdi, u Dr. Ramesh Pokhriyal Nishank heiwa da khana ya oo ya ki kreh wa yatoh wa ka National Institute of Technology (NIT), ha Sohra, yeiwa da sangeh nei duna poisa heiwa u Conrad da kyntu u wow pynlait noh ya ka poisa.
Kam wow kdaw heini, ya ka NIT, Sohra emkaam sa T. 258 klur wow chna ya ka.
U Conrad da yachem u leh ya u montri ka chnat Tribal Affairs Minister u Arjun Munda heiwa da khana u ya ki kaam wa sahteiñ hapoh Meghalaya.
Da pynsñiaw u leh yei sñiawkmen ya ki kaam wow pynku yei rukom im ki jaitbru ri-loom iwa kynthup ya i kreh ha ya ka Tribal Research Institute, yeiwa dang chna ha West Garo Hills.
