Kam chibynta wow yaklam hajrong i chait i khiah wa i khooid i jngiar ki kynthai kiwa chong kset patok, neiliang ka Meghalaya State Legal Services Authority ynnin ka sngi da pynman ko yaka yaklam lyngba ka Internet haka Webinar wa da e pyrtuid “Recommendations on Ensuring Menstrual Hygiene in Prisons” deiwa ya krehlang waka Commonwealth Human Rights Initiative (CHRI).
Hawa e yaki kyntien wai phang u N. A. Khan MHJS, DSJ, DLSA kamjooh u Member Secretary MSLSA da pyntip u wa ha Meghalaya em 983 ki koidi ha ki District Jail heiwa na kini, 19 ngut toh ki kynthai. Kamtæ da ong u wa hanla duna ki leh, ym toh wow mylliñ yei hok yong ki khamtam yei emkaam yong ki kam ki kynthai.
Chooh chooh da ong u wa hapoh ka Section 55 A ka CRPC da booh kyndon ya kitu kiwa lai kem ya ki bru wa hap ki leh wow pait ya i chait i khiah kiwa chah pynbaad, kamtæ kiwa pynlai ya ki patok emkaam wow pynsñiawthooh yaki wow pynbiang yeiwa emkaam ki kynthai heipor wa chah kem ki kamjooh leh ki pulit emkaam ki wow tip ya ini i jooh.
Da ong u leh wa i poi bnai ki kynthai hadooh katni dang ya yait ki bru wow yaklam chaphang ini, tangwa da ban joor u yei emkaam wow sñiawthooh ya ini wei wow pyndooh noh yei ngait biej lane i sñiawthooh bakla. Da kdaw u wa hapoh ka Model Prison Manual 2016 da klam che ko wa emkam wow e yaki ‘sterilised sanitary pads’ cha ki kynthai wei ha u snem 2010, ka sorkar India lyngba ka Health Department da sdang ko yaka Scheme wow pynbiang yaki Sanitary Pads kiwa duna dor, kamtæ da e buit u wow chim kabu ya ini.
Ha kani ka sngi da yaklam da puræ ya kiwa da thoh hajrong ki phang wa kynthup hajrong ka Menstruation as Biological Phenomenon and Range of Disposal and Reusable Products da ka Pratyusha Varanasi; Women Enclosure and Role of Non-Menstruating Ally in Prison Ecosystem da ka Bharati Kannan kawa naka seiñ Boondh.
Da em palat 30 ngut kiwa chimbynta wa kynthup ya kiwa naka Social Welfare Department, ki Superintendent of Observation Homes, Superintendents of District Jails, Panel Lawyers, Para Legal Volunteers, Chairman wa Secretary ki District Level Services Authorities.
