I kynaad pood hapyrdi ka Assam wa Mizoram da poi biang i chei awri awra wa i mynsoo heiwa da em leh ki yung kiwa chah thang ha ki thaw khappood ka Assam-Mizoram hajan ka chnong Bairabi ka Kolasib District ka Mizoram heipor janmiet ynnin ka sngi.
I ya awri hapyrdi kiwa sah khappood kini ki ar jylla da sdang i hadien wa arngut ki wakreh ka Mizoram Power and Electricity Department wa u dkhot yahkhmat ka chnong Bairabi da lai ki wow leh yei sorjamin tangwa da pynbaad wa da chah dat ki ha ki bru kiwa na Assam hadien wa chondur ki, da pyntip ki pulit.
Ki kyrwoh khubor da ong ki wa ha ini i jia da mynsoo ym duna ya 3 ngut ki bru kiwa da pynkit cha ka Hospital wa em cha jan wei ym em wa yap.
Da chah ktah leh ha ini i jia i thaw ka Synod Mission Compound wa em ha Gharmura ha Hailakandi District heipor miet wei da thang leh ya ka skur, ki kari wa ki thaw sah ki wakreh.
Kiwa mynsoo na ka Gharmura’s Mission Compound da kit cha ka Hospital wa em Kolasib District, Mizoram.
Neiliang ki pulit wa ki bor District ki ar jylla da lai hiar ki cha ini i thaw wa jia yow pait yei long i man kamjooh yow pynman yaka takit wei yow pyn jai-jai.
Kam wow pynkynmoo wa haka 17-08-20 da em i ya awri awra won ha khappood ka Mizoram wa Assam ha Cachar District heiwa da khang ya u sarok bah NH-306 hadooh wym yoh de ki kari u psiah u mih cha Mizoram.
Ka Mizoram da em ko le tylli ki District kitæ ka Aizawl, Kolasib wa Mamit kiwa em pood wa jrong 164.6 Km wa ki District ka Assam kitæ ka Cachar, Hailakandi wa Karimganj.
