U Chairman ka Confederation of Meghalaya Social Organisation, u Robertjune Kharjahrin da ong u wa i klam u Lat ka jylla, u Satya Pal Malik wa lada pynkrehkaam ya ka Inner line Permit daw ktah ko ya ka jylla ha i wan kiwa uiñke suwari, ini toh iwa khlem yurim.
Da ong u wa u Lat ka jylla chwa wow man u kam u Lat da jooh kreh u ya ka BJP, katwa kamtæ nood hi u wow lai ong ha Manipur wa ha Arunachal Pradesh wa i pynkrehkaam ya ka ILP daw ktah i ya i wanke ki bru cha kini kia jylla wei wow pyndam noh ya ka ILP yong ki. Da kylli u leh na ka sorkar NDA yei thmu yong ka hajrong kammon u yada ya ka jylla Meghalaya wa ki jaitbru khian paaid yong ka.
Da ong u wa kamwa man hi, ka sorkar India yoobeiñ ko ya ka jylla Meghalaya neibhah wa dang yang yarap bait ko na ka sorkar pyrdi tæ yoo ki wa ki paidbah ha kani ka jylla ympu pdiang ki ya ka BJP, boi tæ slem noh u e ya ka ILP.
U Kharjahrin da pynbaad u leh wa i hiar i kaam uiñke pyrthai ha ka jylla ymtoh neidaw ka ILP tangwa nei wym biang ki luti syngkieñ wa kiwi ki kaam pynroi neibhah lada nujor wa kiwi ki jylla wa krehkaam ka ILP, dang ku ki le chah ha ki kaam uiñke bar ya ka jylla Meghalaya.
Hajrong i duna kiwa wan seiñkhih, da ong u wa i daw toh wa ym em ki rukom krehkaam wa biang yong ka sorkar wei kamwa man katni em kiwa da seiñkhih haap pynlut ki liang wanang nadooh ka bordiñ wa ki mar poh-khyndaw.
Ha iwi i liang u Kharjahrin da ong u wa ym ye wow len wa hawa nujor ya ka MRSSA wa ka ILP em i sariem, tangwa i dawa wow pynkrehkaam ya ka ILP da khih biang i hadien wa da man aiñ ka CAA, wei katkam wa man katni, ka jylla emkaam ko ya waroh ar kini ki aiñ.
